وديـمـة بنت الــــــــــمـــر

[سر الحياة]

السلام عليكم

ما راح اخرب عليكم القصة
بس اللي ممكن اقوله لكم

لا تــفـوتــــكـم :)



الجزء الأول
كنت يالسة أتذكر هذاك القصيد لي آخره يقول..
أرى يا سيد فرقاكم علينا هم وانكالي
وتوحش عقبكم لاوطان لي طولتوا الغيبة
وانا من عقبكم يا زين كني في خلا خالي
ويا سعد الليالي يوم يدني الشمل تجريبه
بديناها..
وبننختمها..
من الأول إلى التالي
إلى رحبت ما تكفي لهم مليون ترحيبه

الله يا زمن..
..مرت سنين وسنين.. بس كأن اللي استوى ينعاد ألف مرة ومرة..
في عصر من العصاير.. وصل ابوي وقام وزقرنا.. قال تعرفون ليش سموني المر يا عيال..
قلناله لا..
قال..
عيل لازم أخبركم...
سمعوا..
استويت في وقت لي ينضا فيه السدر..
وكان في آخر البيت شجرتين كبار بدا ثمرهم ينضح.
عاد يوقولون يوم انا استويت.. كان النبق ذاك الوقت مر وما يتاكل..
فمن كثر مرارته.. قالوا هذا الولد وصل باسمه..
اسمه المر.
وعرف الاولي والتالي هالسالفة..
ومرت الايام والناس كل ما تشوفوني تقولي هاه يا المر..
النبق عندكم بعد مر وما حلا.. ويضحكون..
بس انا حبيت الاسم.. وقلت ما بغيره مع انه يدكم رحمة الله عليه قالي يبوك غير اسمك اذا مب يايزلك.
بس انا ما طعت.
_
اما امايه فكان اسمها سمحة.
الشيخة سمحة.. مثل ما كان ابوي يقول.
قالنا مرة..
أمكم شيخة.. الشيخة سمحة.
يوم خبرتني يدوتكم انها سارت صوب بيت امكم تخطبها..
قالت..تصدق يمكن فوق العشر حريم يالسات يخطبنها قبلي.
قلتلها لا لا يا اميه.. عيل هاي مب بنت هذي شيخة.
ومن هاك اليوم وانا ازقرها الشيخة.

سألناه.. وكيف خذتك يا ابويه من بين عشر خطاطيب..
(ضحك).. تبون الصراحة.. انا روحي ما كان عندي خبر.
بس عاد عقب ما خذتها ما ودرتها.. لي ما خبرتني..

انزين يا ابويه خبرنا..
(ضحك مرة ثانية)..
والله يا بنتي.. قالت ان ابوها خبرها اسامي العشر خطاطيب..
ويوم وصل عند اسمي..
أمكم قالت: لا يكون هذا المر اللي سموه على مرورة نبق بيتهم..
قالها ابوها: هيه..
تقول امكم هنيه.. ضحكت..
وعقبها قام ابوها وقال هاه.. يعني موافقة..
وعاد بعدها ما عرفت شو استوى.
_
عقبها مرت السنين..
ووصل مانع..
ووصلت غوية..
ووصلت انا بالاخير.
_
انزين ابوي اوصف امايا هذاك الوقت.. (قلتله وأنا ذاوية عليه)
(ابتسم ابوي وهو يقولي يا الشيطانه..)..
امكم كانت شيخة بطبعها..
خبرتني يدوتكم.. ان طلعتها مثل شمس العصر.. ذهبية ولامعة..
شعرها الاسود لي فلته طاح قطعه وحدة مثل الشيلة..
رموشها طوال.. بس عيونها مثل عيون
ريم صغيرونه.
قالتلي انها في الحلاة ما شي شراتها.
ويدوتكم.. يابت ذاك الوصف على طول..قالت..
مثل ما قالت الشاعرة..
ماخذ على زينات لعيون
عقل و كمال وحسن فتان
يا ضي جبينه والقمر لون
نور الخدود أو ورد لوجان
لي يلست قريب عنك.. تروح عطرها هذاك العطر الغاوي..
وان مدت ايديها.. تشوف حناها الدقيق..
وان تكلمت.. كانت تقول قصيد..
أمكم.. كلامها أحلى من الشعر.
هنيه عاد ضحكنا كلنا لأنه أمي توه كانت صوب الباب..
قالت: ما عليه بو مانع.. سمعتك تطريني.. .هات خبرني اشعنه ترمسون..
بو مانع: سمعينا شي من هذاك لقصيد يا ام مانع..
ام مانع: هيه.. هذاك اول.. لي قمنا الفجر.. ونزلنا نسلم على عماتنا ويداتنا.. وبعدين نيلس في يمعة. والكبار يتقهون.. وانا أطرز ثوب.. ولا احني حد من البنات..
وعاد بعدين نقول قصايد وحدة من شاعرات بوظبي..
قلتلها انزين امي فديتج سمعينا اي شي.. يلا عااد..
انزين انزين.. سمعوا..
تقول الشاعرة..
هلا باللي نهلي به وشوفه يشرح البالي
ولي رحبت ما تكفي لهم مليون ترحيبه
هلا باللي نرحبه وشانه عندنا عالي
وحبه في زوايا اليوف نرحبه ونمسي به
تراحيب اخص بها عزيز واحد غالي
وفيٍّ عارف المعروف من حسنه ومن طيبه
..قالت بس بس يالله بو مانع كمل عني اذا تذكر..
ابوي قال..
لا بالله اذكر.. انا اللي أذكر..
تقول الشاعرة..
لطيف الملتقى حلو الشمايل زين لجبالي
يزول الهم عني يوم يثني لي تراحيبه
ولو حالت جبال (العين) عن ميراه ما حالي
ولا عن وصلته لي دون لو روحي تولي به
أنا من قبل ما أشوفك بعيني يالغضي سالي
ومن شفتك تنقض جرح في قلبي أعدي به
وسلامتكم.
كانت غوية تعرف تشل.. عاد قامت وشلت بالقصيد..
ويلسنا نضحك..
وحتى اني بديت أنعش يوم شلت غوية..
(خبال) مثل ما يقول مانع.. (خباااال)._
غوية كانت تشبه ابوي في كل شي.. نظرة اعيونه..
ابتسامته الخفيفة اللي صعب انك تلحظها.
رموشها تكحل عينها بلا اثمد..
وعيونها عيون اليوازي..
كانت شاطرة بالمدرسة.
ومعلمات المدرسة ما عندهم غير غوية.
خبروني البنات بأنه أمهاتهم دوم ييبون طاريها وطبعا أكيد بيخطبونها يوم من الايام.
خبرتني وحدة انه امها تقول..
"غوية بنت المر غزالة زمنها.. وبين بنات العرب ما شفت وحدة في وصايفها..)
كنت أدري إنه غوية حلوة..
نظرتها.. وصوتها..
وشعرها الأسود الغاوي..
وشفايفها مثل وردة دقيقة.
كانت أحلى بنات أهلنا وأحلى وحدة ف الفريج.
يمكن هذا خلاها دلوعة اشوي. بس كانت حبوبة.
بعكسي انا.. اللي ظهرت على امايه
كانت اميه عيونها صغار بس سود.
ومانع ظهر على اميه بعد..
كنت مب شاطرة هذاك الزود في المدرسة..
ولا حلوة هذاك الزود... يعني.. زوينة مثل ما تقول يدوه جفلة.
المهم.. سنة 1973
وقتها..كان عمري تسع سنين..
وغوية توها داخلة في العشر.
كان وقت القيظ..
والرطب بانت طلوعه..
عاد هذاك اليوم يلسنا في الحوي وتوسطنا الرطب اللي توه خارفينه من نخل ابوي اللي كان مسافر.
غوية كانت راقدة..
وقامت يوم عيال الفريج دخلوا علينا يلعبون بالرطب ويضحكون.
وانا كنت مثل العيايز.. يالسه اوني في اليولة.. ومسويه عمري "يدوه جفلة".
أسأل أميه هذا حق منوه.. وهذا حق فلان.. وما طرشتو حق فلان.. ومن هالرمسة.
وصلت غوية وهي تفرك عيونها.. وفاردة شعرها اللي نادر ما تفله..
غوية: اميه.. شو اللي رابشنكم من صباح الله..
أم مانع: أي صباح يا بنيتي.. الضحى قرب يفارج وانتي بعدك صباح.. تعالي بس ساعدينا..
المهم.. يلسنا نسولف.. ونضحك.. وتخبرنا اميه عن زمانهم يوم هيه في عمرنا..
دخل مانع اللي كان عمره اربعتشر سنة هذاك الوقت.. وقال وهو مضايج..
أمايه.. ابوي وصل من العين.
أم مانع: بالمهلي.. بس خبرني يا ولدي اش بلاك..
مانع: والله يا اميه ما ادري شو اقول....أ...
أم مانع: عوذ بالله من الشيطان.. خير.. عسى بس ما فيه شي..
مانع: لا يا اميه.. هو بخير.. بس.. بس ما رد بروحه..
كلنا شفنا مانع مستغربين..
كيف ما رد بروحه.. منوه وياه يعني..
قلبي انقبض يوم شفت امايه وهي حابسه دموعها الغالية...
ما ادري.. حسيت لحظتها ان الحياة ما عادت اللي عرفناها..
دخل ابويه وهو مبتسم..
ركضت صوبه.. مع اني كنت خايفه من اللي وياه..بس ركضت صوبه..
حضني بفرح مثل عوايده.. وسلم على اميه وعلى غويه..

وشوي الا قال..
يا الحبايب.. اليوم وياي هديه..
انقبض قلبي من يديد..
قال..
فلاح.. فلاح.. ادخل ادخل لا تخيل..
وشوي الا دخل ولد بعمرنا او اكبر شويه..
شعره اسود طويل.. وعيونه وساع.. نظراته دامعه.. وخطواته غامضة..
خطى صوب ابويه وعيونه ما فارقها الخوف والدمع..
اول مرة اشوف هالقد حزن في عيون ولد..
صحت بداخلي الف مرة يوم شفته..
شعرت بخفوق قلبه.. يسري في هوى البيت..
منوه هو..
منوه فلاح..
منوه يمكن يكون.
عيون اهل البيت بدت شاردة.. كل سرى بداخله خوف وغموض.. وأشتات من حزن وذهول.
تغير هالمسا..
وتغير كل شي فينا...
والصمت وحده تكلم بصوت مسموع...
وانا وغويه.. تكلمنا بالعيون.. وأذكر انه قلنا كثير وكثير..
طلب ابوي ان يشوف امايا بروحهم..
قالها..
يا ام مانع.. ادري ان قلبك كبير.. وما بيضيق على هالولد..
هذا الولد شفته في العين خبروني انه يتيم. عاد قلت ابا ايبه اسكنه عندنا..
ام مانع: يزاك الله خير.. بس يا بو مانع ترى هذا الولد مب صغير كم عمره..
قال بو مانع: عمره اثنعشر سنة..
اميه ما عارضت ابويه.. ولا احد بعد ذاك اليوم سأل أبوي ليش ياب فلاح وياه.
ونفس اليوم وعقب صلاة المغرب..
خبر ابوي هل الفريج أنه فلاح بيعيش في بيته.. وقالهم:
ترى هذا الولد غلاته بتكون من غلاة ولدي مانع .. وبحسبة واحد من عيالي.. اللي يستويبه يستويبي.
قامت امايه وزهبت الحجرة اللي مجابلة حجرة مانع..
وقالت حق فلاح..
يا ولدي لا تخيل.. وترى اللي تباه انا هنيه وان ما حصلتني ترى لا تستحي اسأل مانع أو اسأل البنات..
قالها انشاالله.. خالوه..
وبعدها.. ما سمعنا صوته.
اليوم ثاني.. كنت أول وحدة تقوم من لعيال.. وركيض صوب حجرة مانع اونه اسلم عليه.. لكن كنت ابا اشوف فلاح.
اميه كانت في الصالة القريبة من حجرتهم.. تزهب دلة القهوة.. وصحن الرطب والخبيص.
بس مانع الله يهداه كان مغيظ..
سمعته يرمس ويا اميه:
امايه.. منوه فلاح.. ليش ما قالنا ابوي ان بيبه وياه..
ام مانع: والله يا ولدي روحي ما عندي خبر.. بس مثل ماقال ابوك الولد يتيم..
مانع كان طبعه صعب.. وهو اصلا نادر ما نشوفه يشاركنا الرمسه في البيت.
يوم كنت صغيرة.. كنت اسير صوب حجرته اتأكد اذا كان هو صدق موجود وعايش ويانا.. ولا انا كنت اتخيل!
بس بعد كنت احبه وايد..
المهم..
وقفت قريبة من صوب الحجر.. أتخير ظهور فلاح..
ويوم ظهر.. سرت صوبه..
هاه فلاح.. عرفت منوه انا..
قال.. هيه...
قلتله انزين منوه انا....
(ضحك).. قال عرفت وخلاص..
قتله: لالالا.. اكيد نسيت..
قال: لا... مانسيت.. انتي... انتي غوية...
قتله: شفت عاد... عرفت انك نسيت..
انا وديمة.
وغوية بعدها خامدة ما تقوم للحين.
قتله.. انته تسير مدرسة...
قالي هيه.. بس العام ما سرت.
سألته ليش..

[سر الحياة]

فجأة تغير.. وردله حزنه اللي دخل به علينا البارحة.
حسيت انه ضايع.. وخايف.. ومب عارف ليش هو هنيه.
غيرت السالفة.. قتله شو رايك بالفريج..
قال زين..
قتله.. تعال تعال انا بخبرك عن هل لفريج..
وسرت وياه صوب الباب وفتح الباب شوي ويلست انا عاد اقوله
تشوف البيت اللي مجابلنه.. هذا بيت ام حميد..
ام حميد الله يعينك عليها..
المهم ما عليك..
وتشوف هذا الولد اللي يمشي..
هذا حمود اللعيب.. ولد ام حميد
يقولون انه يبا يستوي لاعب مثل (بيليه) وماا دري منوه.. واخته ميثوه تدرس وياي.. تقول انه عنده كل صوره اللي في الجرايد.. اسميه فاضي..
انزين.... وتشوف هذا البيت..
هذا بيت سعيدان.. شيطان الفريج.. مافي شي ما تعبث به...
وهذا..بيت.. وهذاك...
....وسمعت صوت اميه تزقر من بعيد...
أم مانع: وديمه.... منوه عند الباب..
قلتلها: محد امايه... هذا فلاح..
ام مانع: اي فلاح......
أميه فلاح....... فلاح مااسرع ما نسيتيه......
أم مانع: لا ما نسيته... انزين شو تسوون..
الله يهداج يا اميه.. يالسه اخبره علوم الفريج...
ام مانع: يا اميه لاحقة على علوم الفريج.. خلي الولد في حاله..
ودخلنا البيت.. وسرت صوب غويه اوعيها..
غويـــــــــه... غيووووووووووووووه..
غويه: عوذ بالله... شو تبين ويا هالزعيج........
قومي قومي... تعالي شوفي فلاح...
غويه: فلاح منوه...
أووووووه محد يذكر فلاح بها البيت غيري ولا شو..
غويه: انزين انزين... فارجي الحين. بعدين بشوف فلاح...
حسيت اني الوحيدة اللي شاله هم هالولد... الصراحة في البداية غمضني..
بس بعدين.. استانست لانه فيه حد ثاني في البيت غير غوية ومانع..
أذكر يوم كنت صغيرة.. كنت البس كنادير مانع.. واتعصم واتلثم واسير العب في الفريج..
قلتلهم اسمي.. عتيق..
بس سعيدان الشيطان عرفني.. لكنه ما خبر حد.
عاد تعودت على السالفة.. كل يومين ظاهره صوب الارض الخالية والعب ويا الاولاد كرة..
مانع مب عادته يلعب.. ونحاسة ذاك اليوم قال بلعب.. وانا كنت يالسه بعيد..
قلتلهم ما بلعب خلاص طاب خاطري وبسير البيت..
سعيدان.. (وهو يضحك) قال:
عتوووج تعال تعال .. ما شي سيرة..
يا ربي شو هالورطة..
بس ما عرفني مانع...
ومن هذاك اليوم ودرت السالفة.
أذكر بعد.....
مرة كان ابوي ساير بمبي .. ويوم رد.. ياب حق مانع دوربين (منظار).. عاد مانع كان يسير فوق السطح ويشوف بهذا الدوربين كل شي..
وانا مغتاظه ابا اشوف بس هو ما يخليني..
مرة وهو ما يدري شليته عنه وسرت صوب شجرة لوز ورا البيت.. ويوم وصلت نص اليذع طحت وانكسرت ايدي.. وكسرت منظار مانع اللي حشرني عليه وسو حريجه هذاك اليوم..
كنت أدري اني بسوي شي غلط.. عاد من لخباااال ما ادري ليش كنت اسويه..
ومن هذاك اليوم حرم علي مانع اتعبث بأشيائه...
صباح البيت ما يخلا من لحريم الغاديات والرايحات.. ورباعة غوية اللي مازرين حجرتها.. وانا اتريا ميثا الكسلانه اللي ما توصل الا المسا...
وصلت ام حميد كعادتها العصر..
ام حميد: ودموووه شحالج... شو السالفة.. صدق اللي سمعته.. وينه.. متى وصل.. ليش وين اهله عنه.. والله شو هالناس غافلين عن عيالهم.. وبعدين ابوك الله يهداه ما تريا الا سار شله ويابه.. وين حاطينه الحين.. اقوول... امكم شو قالت.. لا يكون ما درت.. انزين يدوتكم درت...
......... وما خلصت أسئلة.....
وما سلمت امي من لسانها..
أم مانع: والله يا ام حميد بو مانع تدريبه.. وانا ما قلت لا..
ام حميد:..... ولد منوه.. انزين ليش ما خبركم من قبل.. لا يكون يستويلكم... انزين شو قال الحين خبريني.. الحين وينه هو ابا اشوفه....
وانا يالسه اسمع ام حميد وهذربانها.. دخل فلاح وخطف على امي وام حميد..
أم حميد: ........هلا هلا ابوي. شو اسمك.. ولد منوه. ابوي ليش تتغافل عن اهلك لا حول إلا بالله.. وين شفت بو مانع ابويه ها. خبرني...
هنيه فلاح ما عرف شو يقول.. ورد حجرته......
أم حميد (وهي مرتبكة): قتله شي ضايقه لا سمح الله.. انتي تعرفيني يا ام مانع.. بس حبيت اعرف..و...
ام مانع: لا لا ادريبج.. بس تدرين الولد توه مب ضاري عالمكان... ويستحي..
ام حميد (وهي تتحرطم): وين يستحي...
ام مانع: خير يا ام حميد
ام حميد: لا لا اقول يالله عيل بسير عنكم... بشوف موزة شو مسوية... يالله وداعة الله..
ام مانع: فمان الله يا ام حميد..
وطبعا عقب يومين انتشر خبر فلاح في كل الفريج.. ولا.. حتى في الفرجان الثانية..
ام حميد ما خلت حرمة ما خبرتها.
كان فلاح ييلس العصر ويا ابوي..
وعقب العصر يسير صوب بيت حمود اللعيب.. شوي شوي تعرف على هل لفريج.. وقام يتوالف وياهم..
وأكثر واحد ترابع وياه كان حامد.. ولد عمي ظاهر..
حامد من عمر فلاح.. وهو وحيد امه وابوه.. كان يخطف علينا في العصر.. ويظهر ويا فلاح.. وساعات اشوفهم في الحوي يرمسون.. عاد انا الا احشر عمري من بينهم..
قلت من بعيد..
حموووود شحالك... وينك القاطع.. ما تقول هذا بيت ناس اعرفهم.. بمر صوبهم.. بشوفهم يبون شي...
حامد: ودمووووه مرحبتين كبار ولا يسدن... لا لا من اليوم بمركم كل يوم.. لي ما تشبعون مني.. وتقولون فارج بس حشرتنا.. وبعد... بشل عنكم هالولد ما تبونه.......
قتله... استريح يا حمووود.. اذا تبا البيت شله .. بس يوز عن فلاح........
فلاح: حمووود.. ودمووه بتخليك تشرد.. والله الا بتيلسك هنيه وبتسولف لي تالي الليل وما بتمل.
(ضحك حامد وهو يسلم من بعيد...)
عاد ودرتهم.. ورديت عند اميه اشوفها شو تسوي.
عمي ظاهر عنده نخل صوب لعوير..
عاد في القيظ.. نسير جداها ونبات هناك بالايام.
فلاح كان بعده يخيل منا..
ومانع.. ما حاول يرابع فلاح..
بس لانه مانع طبعه صعب.. فكنت متاكدة انه فلاح ما بيتوالف وياه..
في العوير كنا يالسين...
كانت ام حامد حرمة عمي ظاهر ترمس ويا امايه..
وغوية تمشي صوب النخل وبديها قراطيس وما ادري شو تكتب عليها..
غوية كانت تكتب شعر.. وتشل شلات.. وحافظه قصايد اللي تقولهم يدوه جفلة..
وأحلى قصيدة عندها اللي قالتها اميه ويا ابويه يوم كان يرمس عنها...
هلا باللي نهلي به وشوفه يشرح البالي
ولي رحبت ما تكفي لهم مليون ترحيبه
هلا باللي نرحبه وشانه عندنا عالي
وحبه في زوايا اليوف نرحبه ونمسي به
..........
حتى انا كنت متولعه بهالقصيدة.. لازم اطريها كل يوم..
غوية. مع انها حلوة.. واكبر عني.. وكل حد يرمس عنها.. وشوي دلوعة..
بس كان قلبها دقيق وما يتحمل..
واكثر ما يقطع القلب منظر عيونها وهي تصيح..
لانه رمشها وعينها تنمزر بالدموع وحتى رموشها يجيسها الخرس..
كنت دايما اقول اي شي يستوى حقي ما عليه.. بس الا غوية...
كنت مثل ما تقول يدوه جفلة.. (انتي بعد يدوتهم يا وديمة...)

.......أما ابوي وعمي ظاهر
كانوا يالسين في الظل مشغلين رادو ويسمعون الاخبار..
مانع قال حق ابوي ان اليوم سباق الهجن..
عاد سار هو ويا حامد وفلاح..
قتلهم انا بعد بسيير..
لكن طبعا مانع ما طاع..
..........
..............
_
مرت الايام.. وانقضى الصيف.. وبدت المدارس من يديد..


أول يوم مدرسة..
غويه: اماايه شفتي شيلتي الخفيفة....
وانا كنت لابستنها وما ادري انه من نحاستي تباها غوية اليوم..عاد ظهرت من باب المطبخ وركيض صوب بيت ميثوه لاني بسير وياها..

ميثا: وديمه.. شو هالشيله... اكيد مالت غوية...
قلتلها..
كيف عرفتي..
ميثا: واضح.. هذا الذوق ذوق غويه..
يعني انا ذوقي مب حلو...
ميثا: اووه تو الناس الحين اكتشفتي..
.. كانت دايما الأشيا الحلوة تختارها غوية...
طبعا.. لاني ما كنت اهتم وايد.. يعني مخلية كل شي سبيل..
وكنت اعرف انه غويه بتشتري كل شي غاوي.. وانا لازم بتسلفه منها..
هذاك الوقت كان شي باص ياخذنا للمدرسة..
عاد نحن كنا اول ناس نركب ويتم الباص يدوربنا ساعة كاملة لي ما نوصل..
ويوم نوصل لمدرسة.. ما ندخل..
نسير نيلس على الرمل الابيض اللي يحد لمدرسة..
انا وميثا.. وريامي.. و...,و...
ونرمس ونرمس.. ويوم يدق الجرس.. ندخل.
كنت العب بالرمل الابيض اللي كان بااااارد.. وادفن ايده.. وامزر ثيابي رمل..
و الابله تقولي.. (يا بنت.. انتو بيتكم في الصحرا ولا ايه..)
وميثوه تضحك...
اقولها لا ابله..
سيارتنا غرزت وانا عاد قمت اساعد ابوي وحفرت وياه..
والصف كله تم يضحك.....

...في الفسحة
ميثا: ودموووووووه.... وين سرحتي..
والله ما ادري شو سوا فلاح في المدرسة.. هذي اول سنة له هنيه..
ميثا: عادي بيتعود... الا ما خبرتيني تغير ولا بعده..
ما أدري.. ساعات احس انه يبا يسير.. واحيانا اشوف انه محد عنده في الدنيا غير ابوي..
ميثا: اي صف هو..
..المفروض انه يكون ثاني اعداي..
بس العام ما سار..
ميثا: يعني الحينه هو اول اعدادي.. مثل غوية..
...هيه.....
_
كان ابوي يحب فلاح وايد.. واي مكان يسير.. ياخذه وياه..
ييلس وياه العصر.. ويرمسه عن كل شي.. وانا اوني يالسه اذاكر.. بس كنت اسمع واتابع قصص ابوي بالايام..

..عقب العشا
غوية: فلاااااااااح.... فلاااااح..
فلاح: هاه غويه.. شو مستوي..
غوية: ما تشوف قطوة اشكبرها واقف تبحلق فيّ......

وكلنا ضحكنا.. وهو ضحك من خاطره.. حسيت ان بدا يكون اخونا صدق.. يعني.. ما عدنا نسأل منو هو ولا من وين ياي..
ولا عاد يهمنا انه كان غريب...
وحتى ام حميد يوم تبا اميه تقول.. فلاااح سر ازقر امك...
اميه قالتله يزقرها اميه مثلنا.. لكنه ما طاع قالها ما عليه.. بس انا بقولج خالووه..
_
لي طفى ضو البحر..
تدفا دقايق دنيتي..
ولي اختفى ظل القمر..
تحلى أماسي غربتي..
ياللي نسيت الشوق في ليلي جفا
اترك زمن ما بات في عمري غفى
خلني سروحٍ في ربى الاوطان مشتاقه وله..
ابكي على ليل ملاه الغيم اشواق ووله..

كتبت غويه.. قصص قلبها في ساعات الفضا..
وانا.. كنت ايلس قريبة منها..
قريبة.. واسمع صوتها يلعب ويا القصايد والنثور..
كنت ما اعرف اكتب شي.. بس احب اشوف غوية وهي تكتب..
كان شكلها غير.. تكون احلى حيييييييل من اي وقت..
أذكر انها كتبت مرة بس مب يوم كنا صغار طبعا..
(أعذب الوقت الرحيل..)
/
/
/
اكملها

[@ بقايا جروح @]

ياااااااي فـــــديـتــج ســرســر


سيفتهــا وراح اقــراها

شكـلـهـا قممة

مــدام ذوقـج اكيــد بتطـلـع روعــة


القصة ايمااارتيه صــح

فديت رمستهم :)


بس غلاااي لاتبطين بالأجــزاء << حنااانه :)

[سر الحياة]

هلابكـ جيجي

فديتج يارب

ما راح أطول

[سر الحياة]

قلتلها ليش يا غويه...
ليش اعذب الوقت الرحيل...
قالتلي الرحيل يا وديمه.. ينهي عمر كامل في لحظة.. تخيلي.. عمر وذكريات.. تنتهي بوقت الرحيل..
مع انه الرحيل مر.. بس ما ادري ليش اشوفه عذب يا وديمه .. ما أدري..
خفت من كلام غويه..
خفت.

قلت حق امي مرة وهي يالسه في الحوي والجو برااد.. تتريا ابوي يوصل من ميلس عمي ظاهر..
أمايه.. شو تشوفين..
قالت..
اشوف القمر يا وديمه..
قلتلها ليش.. مب سادنج هالكم قمر اللي في البيت...
(ضحكت...) الله على ضحكتها الغاوية... الله...
قالت.. تعالي يا وديمة..
تشوفين هالقمر.. كان هناك وياي وانا صغيره..
يوم يوصل الليل.. يدوتكم تقوم توري ضو.. وتيب هذاك الحصير اللي مشراي من لبريمي وتفرده في الحوي.. ونتيمع نحن.. وخالاتكم وخوالكم.. ويدوتنا.. وابويه.. وسوالف ورمسه.. ولا نمل..
وكنت انا ويا القمر دووم.. اشوفه.. وارمس وياه..
كنت اشوف يدوتكم وهي تسوي خيوط التلي..
واقول بسوي خيط من هنيه لي القمر.. ولو خذ مني عمري كله..
قلتلها........
انزين اليوم شو قلتيله.. خبريني...
(ضحكت)....
قتله.. هيه يا القمر.. والله كبرت وشوبت وطاح سوقك..
الحين عندي مب الا قمر واحد.. عندي اقمار في البيت..
(وهيه تشوفني وتلعب بشعري..)
وصل رمضان هالسنة بسرعة..
حسيت ان العمر يسري.. ونحن مب مثل لاول..
كل شي تغير..
غويه.. كبرت.. احلوت اكثر واكثر.
وانا... امممم.. حليلي.. بس وحدة من عيايز لفريج قالتلي مرة وانا خاطفه عليها..
..(منووه انتي...... ودمووه..)
قتلها هيه..
قالت....( شوفو البنت شوفو.... من وين هالحلاة يا ودمووه هاه.. انتو شو يجسمون الحلاة في بيتكم.. مثل ما يجسمون لهريس)
عاد فلاح كان واقف صوبي وسمعها..
قال..
عوذ بالله يا العيوز.. صلي عن النبي ويا عينج هاي تقول عين ذيب..
أول مرة حسيت انه فلاح يخاف علينا مثل ابوي ومانع.. ويحبنا..
ما كان يقول انه يحبنا.. بس كان يحبني انا خصوصا.. لاني اسولف وياه .. ونلعب ويا بعض..
كنت العب وياه تيله..
قالي ودموووه.. صدق انك عيوز.. منوه يلعب تيل الحين.. بس عقب يرد يلعب وياي.
واشوفه يوم يلعب ويا مانع شطرنج اللي طرشله اياه خالي يوم سار مصر.. وتعلمت اللعبة حتى اني كنت اغلبهم كلهم..
وادوربها في البيت واقول هل البيت.. حد يبا يلعب ويا ودمووه...
ويوم ما القى حد.. اسير عند الهندية اللي توها واصله من بلادها والعب وياها.. لا واخليها تغلبني ساعات عسب اتحرطم عليها.
.....مرت ايام رمضان.. وقرب العيد.. وخبرني ابوي انه شرى لي طقم ذهب.. واحد حقي والثاني حق غويه..
قتله ابووووووووووووووويه يا نور دنياي ما ابا شي صدقني..
(وضحك هو واميه..) وانا يالسه العب في الحوي وأغني..
بعدين سكت ورديت صوبه.. قتله ابوي.. بس انا وغويه..
عيل هالشيخة.. وين صوغتها..
هالمرة ضحك بصوت عالي...قالي
ما تيوزين يا ودموووه..
امكم بعد شرينالها..
كان العيد.. عيدين.. اول شي سمعنا انه يدوه جفله بتوصل تعيد عنا.. عاده انا الارض ما وسعتني من الفرح والغناوي..
والعيد الثاني.. انه فلاح لاول مرة بيعيد ويانا..
كان يالس في الحوي يو سرت صوبه قتله: فلااااح...
العيد بي..
قالي: حياه الله..
عاد انا ضحكت من قلبي...
قتله: فلاااااااح صدق لا.. العيد قريب.. تقولي حياه الله..
قتله وينها كناديركم اليدد..
عاد انا كنت غاوية كنادير.. تعيبني اشكالها وهي يديده.... لا.. ساعات البسها ومانع ما يعرف..
قالي ما ادري: منوووع عنده خبر..
قتله انزين تعال وصلني بيت قوم ميثا.. بشوف شو خيطت حق العيد..
فوق سطح بيت قوم ميثا علم اخضر مال الحجاج.. مرزز مكانه من سنتين..
قلت حق ميثا..
ميثوووه.. هذا العلم لي متى يعني بيتم مكانه..
ميثا: ما ادريبها امايه متى بتشله..
قتلها ليش يعني صعب شلوله..
ميثا: لا بس اميه تقول.. هذا عشان اللي ما ياها وهي رادة من الحج.. يستحي على ويهه وايي..
قتلها اسميها امج بعد... منوه بييها الحين..
بتشوفين روحي بسير وبشله..
قالت امايه باجر بتوصل يدوه جفله.. خالكم ذياب بيبها وهو راد دبي..
عاد سرت انا واميه انظف حجرتها.. وغسلنا الزوالي.. ورشيت السرير بماي الورد.. ودخنّا الحجرة.. ويبت مصحفها اللي محفوظ في المندوس الجديم.
وطول الوقت اغني بأغاني يدوه جفله.. اللي كلنا كنا نحفظها...
قلت...
(يا خشيف الريم لمفلي
إنت لي للصب راحاته
شوفني م الحال منسلي
كالقلم تبريه مبراته..
...وأسمع غويه من الحوي وهي تنظف وتقول..
(شلت حمل متعب الشلي
وامرحت بالحيل قواته
دوك ما في القلب يا خلي
والذي عنك اليه هاته..
.........ومانع من بعيد يكمل بصوته الروعه اللي ما يغني به... بس ساعات اتيه حالات ويغني....
(لك محل فيه ما حلي
غير حضرة شخصك بذاته..
سيدي يا كامل الدلي
يا شفا يرحي وعلاته..)
..وبعدين كلنا بصوت عااااااالي..
يـــا خشيف الريـــــــــم لمفلي
إنت لـــي للصب راحاتــــــــه
شوفني م الحـــــــال منســــلي
كالقـــــلم تبريه مبراتـــــــه..
ومانع اونه يالس يدق عود بيديه.. ونحن نغني.... وامايه تضحك...
والهنديه مغطيه اذنيها من الحشرة..
حتى فلاح يلس قريب من اميه يحفظ القصيدة..
....ونحن مشغولين بفرحنا..
دخل ابوي.. وشاف اميه وعيونه ممزورة حزن...
قال يا عيال.. كنت عند عمكم ظاهر قبل اشوي..
بس................... (سكت.. وبدت دموعه الغاليه تلمع بعينه)
حسيت بغصة في قلبي..
قال عمكم يا عيال مريض.. ولازم يسافر...
وسار صوب حجرته..
سار..

[سر الحياة]

_ وسارت صور عمي صوبنا...
ويلسنا نفكر بكل ذكرى مرت علينا وياه...
الانسان اللي دايما نحس انه قوي.. وما في شي يصعب عليه..
في صغرنا....
كان لازم يمر علينا كل يومين وياخذنا ويا ولده حامد..
كان دايما قريب.. يسأل عني قبلهم كلهم...
يقول ........
"يا هل البيت.. وين وديمتي".........
وين وديمتي..... الله يا عمي ظاهر... ما احلاها وصوفك وقصصك..
ساعتها.. حسيت اني لازم اسير صوب بيتهم.. وايلس قريبه منه... وما اودره.
عقب صلاة المغرب...
كلنا سرنا جدا بيت عمي ظاهر.. نشوفه ونسلم عليه..
يوم شافنا..
.....قال
"ودااااامي.... شحالج... غوايه شحالج....."
بغيت اضحك... واصيح.. واحضنه.. بغيت بس اشوفه وما اشبع من شوفته.
قال... يا عيال ترى ما فيني شي.. بس هذا ابوكم الله يهداه..
ولا انا بخير.
هذا عمي... عمره ما يتغير..
عاد بدت عقبها ضحكاته وسوالفه...
حامد كان يرمس ويا فلاح في الحوي..
اما نحن فيلسنا عند عمي نسمع شو يقول..
ومر الليل..
غويه.. كانت يالسه تكتب..
قتلها شو تكتبين يا غويه...
قالت ما شي (ضحكت...) بعدين شفتها تصيح...
قتلها شو فيج يا غويه... ليش تصيحين...
قالت..
مرة كنت يالسه في بيت عمي يوم قفلت علي باب الحجرة.. كنت صغيرة.. ما عرفت افتح القفل.. ويلست اصيح.. محد كان في البيت غير حامد اللي كان يلعب برع.. وعمي كان في الصالة.. وما يسمع..
بس بعدين.. ركض يوم سمعني وسار صوب الدريشة وهو يقولي لا تصيحين.. لا تصيحين.. وانا يوم شفت صحت اكثر..
عقب كسر الباب.. وشلني.. وخذني ويا حامد وسار شرالنه ايسكريم.
من يومها.. حسيت ان عمي بيكون قريب في اي وقت بحتاجه..
بس..
بس اليوم يوم شفته يا وديمه.. وهو راقد في نفس الحجرة اللي انقفل علي فيها الباب.. حسيت انه هو انقفل عليه الباب هالمرة...
آه يا وديمه.. ما ابا اشوف كل شي يتغير..
ما ابا اقوم الصبح واشوف عمي محد...
(..وحطت راسها عالطاولة.. ويلست تصيح ما ادري لي متى)
وصل الصبح.. ووصلت وياه يدوه جفله وخالي ذياب من العين..
ركضت صوبها.. قتلها يدوووووووووه يدوووووووووووه يا كثر ما ولهت عليج...
وعيال الفريج يوم يلمحون يدوه جفله.. يزقرون بعض و ايون يسلمون عليها.. وطبعا كانت يوم اتي تيب وياها خريطة ممزورة حلاوة ولبان وعصاير..
وتوزعها عليهم..
سلمت على خالي ذياب..
وسرنا صوب الميلس.. يدوه سارت حجرتها وزقرتني..
ابويه وامايه يلسو عند خالي يسولفون..
ودخلت غويه.. و فلاح ومانع..
خالي مب شايف فلاح من قبل.. بس امايه خبرته عنه..
قام وسلم عليه.. قاله انته كنت ويا غديّر ولدي في المدرسة ولا انا غلطان..
قاله هيه..
وانا في قلبي اقول. اخيرا عرفت حد يعرف فلاح..
عاد قلت حق خالي..
خالي.. وين عوشه وغدير ما يبتهم وياك..
ضحك.. قال انشاالله بيون المرة اليايه..
انا كنت ابا غدير عسب اسأله عن فلاح.. ولا ما ابا اشوفه...
بعد شوي..
يلسوا في الميلس..
انا وغويه سرنا عند يدوه جفله في حجرتها..
قالت.. دوكم.. هذا ثوب من العين.. واحد حق غوية والثاني لج يا ودامي..
ويلست تسولف عن عيال خوالنا.. منوه خلص دراسه.. ومنوه سافر.. ومنوه خطب..
كانت تعرف قصصهم واخبارهم.. واحد.. واحد..
الكل كان يحب يدوه جفله.. وما يمل من سوالفها..
عاد يوم عرف خالي خبر مرض عمي ظاهر.. قام وسار يشوفه ويا ابويه..
وعقب شوي يدوه قالت تبا تسير بيت عمي عسب تشوفه...
عقب العصر..
وصلت سهيلة ربيعة غوية...
سهيلة كانت ربيعتها الروح بالروح.. دايما ويا بعض.. كانت تكتب مثل غوية شعر.
وسرنا الحجرة نشوف شو مزهبين حق العيد..
ويلسنا نسولف ونرمس وعقب شوي سمعت صوت اميه تزقر علينا..
تقول انه ابوي ويا عمي ظاهر.. وبعد ربيع عمي ظاهر سلطان بيسافرون عقب العشا..
بيسرون لندن عسب علاج عمي ظاهر..
فطلعنا انا وغوية ويا فلاح ومانع صوب بيت عمي ظاهر..
سلمنا عليه ويلسنا ويا ولده حامد نسولف..
وبعد يلسنا نسولف ويا ابويه لانه ما بيكون ويانا في العيد.
عقب العشا ظهروا صوب الشارجه.. لانه طيارتهم من هناك...
ودعناهم وردينا بيوتنا.. وكل واحد وياه ذكريات عمي ظاهر اللي لا يمكن ينساها..
غويه.. اكثر وحدنا كانت متأثرة..
طول الوقت ساكته.. بس يدوه جفله ما خلتنا..
قالت تعالوا الحوي بنوري ضو...
قتلها الله.. ذكرتيني بامايه يوم صغيرة..
قالت.... ودمووه امكم بعدها صغيرة...
وضحكناااا..
كان الوقت شتا.. والعيد كان في الشتا...
عاد يلسنا نشوف يدوه جفلة وهي تسوي (البثيثة).. انا وغويه نشل طعام السح.. ونسمع يدوه وهي تشل باقصايد وتسولف..
قالتلنا ... سمعوا..
كان في ريال شيبه.. عنده ولدين..
وعنده (بيب دبس) فاضي.. كل يوم يحط فيه حصاة صغيرونه.. لي ما انمزر...
وقبل لا يموت قال حق عياله (تناصفو اللي في بيب الدبس).........
عاد العيال قالوا اكيد هالبيب ممزور فلوس..
وقبل لا يفتحونه.... اتضاربوا..
واحد قال انا الاكبر.. باخذ اكثر.. والثاني قال لا انا باخذ الاكثر.. ونسوا وصية ابوهم..
وسكتت يدوه...
وانا ازاعج اقول حق يدوه شوووو استوى ......
قالت خلاص.. خلاف بخبركم. الحين سيروا رقدوا..
باجر الصبح لازم تتحنون...
قتلها... لا يدوه الحين الحين..
(ضحكت).. خلاص الصبح يوم تتحنون بخبركم انشاالله..
وسرت طول الليل وانا افكر شو بيسون بالبيب واضحك..
تالي الصبح..
يلسنا في حجرة يدوه نتريا تنحنينا الحنة اللي يايبتنها من العين..
وقبل لا تحنينا..
دخلت ميثوه قالت لي...
ودمووووه شو تسوين..
قتلها اتحنا بعد شو اسوي...
قالت.. لالالا الحين ما يتحنون هالنقشات... مال اووول..
قتلها عيل شو يسون..
قالت.. ما شفتي حرمت خالي شو مسويه.. البارحة كانت يايتنا.. مسويه نقشة صغيرونة وسط ايديها... الله يا ودموووه حناها يخبل..
يدوه جفله سمعت..
قالت.. اشو بعد نقشه صغيرونه.. حلاته الحنة يوم تنمزر به اليد..
قالتلي ميثووه وهي تهمس..
صدقيييني بيضحكون عليج لا تسوين..
بس انا ما طعت.. وسويت الي قالت عليه يدوه جفله..
قلت حق ميثووه تعالي سمعي قصة يدوه.. وسرت زقرت غويه ويلسنا نسمع يدوه جفله وهي يالسة تحنيني..
قالت انزين.. وين وصلنا.... هيه.. سمعوا
يوم تضاربوا الاولاد على (البيب)..
قالوا بنسير عند القاضي.. وبنسمع شوره..
عاد القاضي سمع قصتهم وقالهم انزين..
شوفوا..
هاتوا البيب ونثروه علي..
الفلوس لي بتم على راسي وعلى اجتوفي حق الولد العود..
واللي بتتناثر عالارض .. هذي حق الولد لصغير.. موافقين
وافقوا الاولاد.. وساروا ينثرون البيب على راس القاضي..
وطاح الحصى عالقاضي وهو يقول...
آآآآآخ.. حسبي الله عل بليسكم.. أأأأخ.. آآآآخ..
وبدل ما يحصلون لفلوس..
القاضي أمر انه كل واحد ينثرون على راسه بيب حصى..
.......عاد ضحكنا من الخاطر....
وتقول يدوه الناس لي اليوم يقولون حق الطماع.. (يبالك بيب حصى على راسك..)
كان العيد باجر.. بالاثنين...
عاد اول مرة اشوف البيت فاضي..
لانه ابوي محد.. وعمي ظاهر بعد محد..

[سر الحياة]

بس الضحى.. دخل خالي وياه (بيك آب) ممزور سامان..
وسار عاد فلاح صوبه يشلهم وياه..

قالي ودموووه.. تعرفين منوه بيلس وياكم هالعيد.. قتله منوووووووووه...
قال..... خالج بعد منوووووووه ...
ويلسنا نضحك.

كان خالي ذياب بيعيد ويانا يوم العيد.. واليوم الثاني بيرد العين.
عاد ليلة العيد كانت محلاها ويا خالي ويدوه جفله اللي كانت تقصد وتشل ويا غويه..
وانا وامايه قريب الضو..
وخالي وفلاح ومانع يلسوا يسولفون ويخبرهم عن ايام اول...
وكلنا بثيث.. وخبيص..
وخالي كان يايب حلوى من عمان حق فالة العيد..
بس سار ويابلي لقمة حقي والثانية حق غوية..
قال بس حق العرايس..
بعدين ياب الحلوى وجسمها عالجميع..
يدوه قالت.... ذكرت ايام اول يا عيال...
ليلة العيد.. حياة ابوي كان ايي وشال وياه خرايط ما نشوف شو فيها..
وطول الليل نفكر شو يايب ابوي حق صباح العيد..
والصبح عاد نشوف..
كنا نعرف انه يايب حلوى.. ورطب ولا سح..
بس بعد كنا نفكر شو في الخرايط..
قتلها يدوه..
ليش ما تشوفون اللي بداخلها..
قالت وهي تضحك... هيه يا بنيتي هذا كان عيدنا.. واذا شفنا خلاف ما بيكون عنا عيد..

وضحكنا كلنا.

فلاح كان يسمع سوالف يدوه جفله...
هي حبته وايد..
قالت حق امايه فلاح حطوه في عيونكم يا سمحة..
هذا الولد يذكرني بشي بس ما ادري شو...
امايه كانت تحب فلاح وايد.. ودايما تنشد عنه.. واول ما توصل من مكان تقولنا سيروا ازقروا اخوكم.. أو وينوه اخوكم.. اخوكم وصل ولا..
كانت تعتبره مثلنا.. ولا يوم حسسته انه غريب عنا.
مع انه حريم الفريج كلهم ما عيبهم فلاح يعيش ويانا..
وحتى هل لفريج ما كانوا يحبونه مثلنا...
بس نحن كلنا حبيناه وايد.. حتى مانع ترابع ويا فلاح.. مع انهم يتناقرون ساعات بس لعب مب صدق..
عيون فلاح السود دايما لامعة.. وما تقدر ما تحزن اذا ما شفتهم..
كان يستحي يكون ويانا خاصه يوم حد غيرنا في البيت..
بس انا ما اخليه لازم من الصبح اسير صوبه ونلعب ونسولف ويوم يوصل حامد يسيريون الحوي ولا يسيرون عند حمود اللعيب...
وامايه تحاتيه طول الوقت واذا تاخر لازم تظهر تسير تشوف وينه..

ما ادري ليش رديت افكر في فلاح هذيج الليلة..
قلت حق غوية..
.... منوه يمكن يكون فلاح...
قالت.. ما ادري... بس.... (سكتت)
قتلها بس شو..
لكنها ما كملت..
ويلست افكر بفلاح.

* * *

صباح العيد.. ردوا الخلق من المصلى..
امايه سارت ويا يدوه جفلة وانا وغويه يلسنا نتزهب..
بس ما لبسنا طقوم الذهب لي شراهم ابويه..
لانه هو اول واحد لازم يشوفهم علينا.
اما الجلابيات فكانت مغربي..
دخنت غويه البيت...
وتجحلنا... وتعطرنا بدهن العود السيف.. ويلسنا نترياهم..

اول واحد دخل مانع سرت وايهته.. وقالي وديمه تصدقين ما عرفتج.. شو هالحلاة.. قتله لا والله.. يعني انا دوم مب حلوة.. (ضحك)..

عاد هنيه ظهرت غوية من الحجرة.. كانت احلى بنت اشوفها في حياتي..
فاله شعرها ويابته صوب واحد على جتفها.. ومنزلة قصة على عيونها.. والجحال اللي مخلنها عيون مها صدق صدق.. وتذكرت الحرمة اللي قالت (غوية بنت المر.. من احلى بنات العرب)
مانع.. قال الله الله... امايه.... لا تدخلين حريم اليوم بيتنا..
قالت ليش يا ابويه..
قالها شو ليش يا اميه..
تبين تستوين يده من الحين..

عاد غويه وهي تضحك (قالت يالبايخ)
وسارت سلمت عليه وباركتله بالعيد..
وسلمنا على امايه ويدوه جفله...
وخالي ذياب..
وكلهم قالوا اني وايد حلوة.. لكن طبعا غويه غييييير...

بس فلاح ما كان وياهم...
سألت عنه...
خبرني مانع
فلاح سار ويا حامد بيتهم لانه ام حامد لزمت انه يتريق ويا حامد..
انا زعلت.. كنت ابا اشوفه.. وحتى غويه كانت تبا تشوف فلاح..
كانه كل هذا التعدل عسب فلاح...

وقبل الضحى..
انمزر البيت حريم..
والميلس ريايل يسلمون على خالي ذياب.. وينشدون عن ابويه وعمي ظاهر..
وحامد ومانع وفلاح يلسوا في الميلس بعد..

وانا كنت يالسه ويا غويه ويت ميثوه وسهيلة.. وفطامي اخت سهيلة...
فطامي كانت حلوة وايد.. كانت طويله.. وسمرة اشوي.. وعيونها وساع...
واميه طول الوقت تشوفها وترمس وياها.. لانها من زمان مب شايفتنها...
والحريم كلهم كانوا يشوفون غويه الي ربطت شعرها ولبست شيله مثل ما قالتلها امايه..
وما خلتنا نيلس في الميلس..
سلمنا وظهرنا.

يدوه عرفت السالفه.. وقالت حق امايه لالا يا سمحة.. بتودرين بنيات اخوانج وتاخذين من الغرب..
اميه ما قالت شي. بس عقب قالت حق يدوه.. لا يا اميه مانع صغير بس البنيه حبوبة عاد قلت برمس وياها..
بس فطامي دخلت في قلب امايه وحبتها.. وطبعا.. (ولا بعدين بخبركم شو اسوتا ويا فطامي)

ومر الضحى.. وخلا البيت..
خالي ذياب قال بنسير صوب نخل عمكم ظاهر في العوير العصر اشرايكم..
عاد يدوه زهبت الفاله.. وامايه رتبت الاغراض ويا الهندية...
وعقب العصر سرنا جدا بيت عمي ظاهر وخذنا ام حامد وحامد.. وسرنا صوب لعوير..
حامد وفلاح يلسوا جدام..
ونحن ويا مانع يلسنا ورا.....
واذكر في السيارة يدوه سمعتنا قصيدة واااااااااايد حلوة عن العيد..............
قالت سمعوا شو تقول الشاعرة...
عاد كلنا انتبهنا وخصوصا غويه اللي تحفظ شعر يدوه جفله كله..
قالت..

مسا الأثنين من عقب العصير
علينا أسفرت الآفاق نور
هلا يا فرحة العيد الكبير
ثواني عندنا تسوى شهور
ثواني سعد في وقت قصير
تضاعف عنديه فيها السرور
بكم رحبت من قاصي الضمير
تراحيب كبار بلا قصور
عدد رمل النخيـــــل إلى العويــــــــر
إلى لهبـــــاب واطعوس البــــــــرور
لكم بهدي تحياتي كثير
وتسليمي عدد وبل المطور

...... كان القصيد روعه.. حتى كل شوي نقولها يدوه بعد مرة.. بعد مرة..
وحليلها تمت تعيده علينا .

وصلنا لعوير.. ونزلنا..
غويه صاحت يوم شافت نخل عمي ظاهر..
عاد صيحت وياها ام حامد وامايه بعد..
ويدوه تسكتهم.. وتقولهم لا حول إلا بالله.. الريال بيرد يا ام حامد.. ما فيه الا العافية..
بس غويه كانت اكثرهم..
حتى انها ما رمست طول الوقت..
انا ويا حامد وفلاح سرنا صوب البوش.. وفلاح رمس اول مرة عنه يوم صغير..

قال كنت كل يوم اسير صوب بوش قوم يدوتي..

قتله منوه يدوتك.. قال توفت العام.
ما ادري.. قلت يمكن كان عايش عند يدوته ويوم توفت.. ابوي يابه..
بس كنت مستانسه اني سمعت شي عن حياته اللي ما خبرنا شي عنها من قبل..
قال هالكلمتين وسار صوبهم وانا واقفه عند مانع.. يقولي هاه بتين تركبين المطيه..
قتله لالالالا.. شو تخبلت.. ما ابا.. (مع انه كان فخاطري اركب..)
بس فلاح سار.. وقال بيركب...
حامد ومانع ساروا وياه...
وخالي ذياب من بعيد كان يقول شي بس محد سمعه..
.. فلاح سار صوب الناقة.. اللي هاجت مرة وحدة..
وتمت ترافس..
وصابت فلاح الي طاح بسرعة... عاد حامد ومانع ما عرفوا شو يسووون وانا اصارخ على خالي اقوله خااااااااااااااالي فلااااااااااااااح ما ادري شو استو به.....
واشووووف خالي يركض من بعيد..
امايه وام حامد بعد كانوا يمشون بسرعة صوبنا..
وانا اصيح.. وازاعج....
حامد تجدم وسار صوب المطيه وسحب لثامها وهي ترفس وتهيج.. ووداها بعيد..
وفلاح..............

________________

[سر الحياة]

وفلاح تم في مكانه.. ما نسمع منه لا صوت ولا حس...
.......يلست اصارخ واصارخ: فلاااااح.. دموعي اختلطت بصدى اسمه.. وقلبي انتفض من الخوف..
فلاح.. اللي نحبه.. اللي ما نطيق البيت بلاه..
شفته ممد عالارض لا نصخ ولا حياة..
خفت اني اشوف ويوه حامد ومانع.. خفت اشوف خالي.. ما كنت ابا اسمع غير انه فلاح بخير...
امايه وصلت عنده.. وهي تصيح وتزقر عليه.. وخالي يحاول يوعيه لكنه ما قام..

آآآه..... يا قلب
آآآه من شوفة انسان غالي.. محشور بين حياة وموت.. ولا تقدر تمسح ايديك على جبينه وتقوله بتكون بخير..

خذاه خالي.. وساربه على المستشفى.... امايه ومانع ساروا وياه..
نحن يلسنا نتريا الخبر.. مصدومين.. ومب عارفين شو نقول...
ويدوه جفله تدعيله وهي تقولنا ما عليه شر...

كانت الثواني تمر بطيئة بطيئة.. كأنها دهور تسري..
وصلنا الخبر عقب ساعة...
خالي كان عالتيلفون يرمس يدوه جفله...
..(وانا الدموع محشورة بين جفوني.. تنبع مثل عيون الماي..) كنت ما ابا اسمع شي.. بس بغيت اشوف فلاح يضحك مثل ما كان دوم..
بغيت اشوفه يدخل علينا وهو يسولف ويا حامد ويقولي ودموووه...
بغيت اسمع (ودموووه) منه اكثر من اي شي في الدنيا.


.... سمعت يدوه تقول الحمدلله... بشرك الله بالخير...
عرفت.. بس عرفت......... ما كنت ابا اعرف اي شي ثاني بعد...

قالت يدوه بصوتها الدافي....... يا عيال. فلاح بخير..
فلاح بخير..
فـــــــلاح بخير..
الله يا فرحة.. ما تساويها في الكون فرحة..

فلاح بخير.... يعني وديمه بخير..
فلاح بخير...
كلنا بخير.

خالي وصل عنا عقب المغرب..
وسرنا البيت عند فلاح.

شفناه وهو راقد وامايه تداريه. جاسته حمى شديدة هذيج الليلة..
انا وغوية يلسنا قريب من حجرة فلاح.. وخالي قال نرده المستشفى مرة ثانيه..
بس يدوه حطتله كمادات.. ويلست تقرا عليه..

محد رقد هذاك اليوم..
حتى ام حامد كانت في بيتنا.

كلنا حسينا بغلاة فلاح عنا.
هذا الولد اللي يابه ابوي من فترة قصيرة.. استوى جزء من حياتنا.. ما نقدر نحيا بلاه.

مرت ثلاث ليالي.. والحمى ما تفارقه.. كان يقدر يتكلم ويضحك مثل ما كان... بس ما قدر يمشي الا بصعوبة..
في الليل.. كان ينتفض.. كنت اقدر اسمع صوت نصخه من حجرتي..
واسير صوب حجرة اميه ودموعي تغسل عيوني ولا اقدر اوقفها..
قتلها امييه... فلاح يا اميه.. صوته يذبح كل شي فيني يا امييه..
سيري صوبه...
كانت تسير وتيلس عنده.. وتمسح راسه..
يدوه جفله ما ردت العين.. بس عشان تيلس عند فلاح وتسهر عليه...

حبس آلامه في داخله.. آلام.. وآلام... مب بس الحادث.. لا
كانت آلام حياة كاملة.. ساكنة بقلب فلاح الطيب...
بس عمره ما كان يبى اميه تتعب عشانه..
كان يقولها انا بخير..
انا بخير..

عاد انا ومانع وحامد.. حتى غوية كنا نيلس عنده طول اليوم.
ونسولف.. ونضحك.. ونتكلم عن كل شي...

ضحكنا وايد هالايام...
ما ادري.. كأنه قلوبنا كانت حاسه انه ايام ضحكها بتقل.. او بتغيب...!

***

......بعد ايام
اتصل ابوي وانا اللي رديت عليه.. ويوم قالي انه عمي...........
قلت اماااااااااااااااااااااااايه..........
اماااااااااااااااايه.... اماايه.. ابــ.. ابويه.. يــ.. يقول... يقول..
(ما عرفت ارمس..)
خذت اميه التيلفون.. وهي تصيح.. وقالت الحمدالله على سلامته...
عقب قالت يا عياااااال عمكم ظاهر..
بخير.
وبيرجعون قريب...

***

فلاح طاب.. ورديت اقوله.. فلاح مرة ثانية بركب المطية وياك.... (يلس يضحك)..
بس انته شوفني من بعيد..
وامايه تسمع.. تقول لالالا حشى لا فلاح ولا انتي.. ولا غيركم يقربون من المطية..

........أم حميد كانت اتي كل يومين وترمس ويا امايه وتسأل عن فلاح..
وطبعا اتيب وياها ميثا..
وتبدا سوالفنا اللي ما تخلص...


في ليلة باردة..
ما ادري.. برودتها من الجو.. ولا من احساس غامض احتبس بداخلي..
مشيت في الحوي بروحي.. مشيت... ومشيت..
يمر علي هوى الليل.. وانا امشي..... سارحه افكر بحال الايام.. بحال فلاح.. وبحال غويه ومانع..
شافتني امايه..
قالت... يوم يوصل الهوى البارد.. توصل وياه سلامات القلوب من مكان لي مكان..
تسافر.. مثل الهوى اللي يسافر يا وديمة..
قتلها اميه..
وانتي طرشتي سلامات ويا الهوى...
(ضحكت بحزن)..... هيه يا وديمة... كنت اطرشهم حقكم..
الشوق ساقنا لايام بعيدة.. بس شوقي.. كان لناس ما عرفت اني بشتاقلهم بهالغزارة...
ابد ما عرفت..

[سر الحياة]

.....
وصل ابويه وعمي.. ووصلت فرحتنا اللي غابت من ليلة العيد..
كان عيدنا صعب.. وغريب.. وعشنا مشاعر ايديدة ما ضرينا عليها...
بس حسينا بغلاة ناس في نفوسنا... (غلاة نااااس)....

***

...............
.............
.....ومرت حياتنا مثل اوراق الشجر... اللي يطرب لها الهوى والشوق
مرت.. ومر كل احساس دفين كان فينا..
مرت... وكبرت قلوبنا بالمحبة..
ومازجها شوق... ووله غريب.. غريب...
.....وكبرت الحياة فينا..
الله يا وقت مضى...



***


.... في عصر من العصاير..
امايه كانت يالسه في الصالة ويا ابويه يكلمون مانع في بريطانيا..
ابويه: هاه مانع... انشاالله شهاداتكم ظهرت.... متى بتوصلون...
وعقب سمعته يقول..
انزين يا مانع سلم على فلاح.. على خير......... مع السلامة..

قتله ابويه... صدددق اللي سمعته.. صدددددق..
(ضحكلي..)
قلت.. الله.. يا ربي اخيرا بشوفهم اخيرا.. وانا اصيح.....


ليالي البيت كانت هادية.. عقب ما سافر مانع وفلاح يدرسون برع..
كنت اشتاقلهم كل لحظة اخطف بها صوب حجرهم...
وساعات اوقف بالدقايق واشوف حجرهم ولا اقدر ادخل وايلس فيها..
امايه تتصل فيهم كل ليلتين..
وابويه يرمسهم العصر.. بس ما يتهنى بسوالفهم لاني اخطف عنه التيلفون وايلس اسولف واسولف واقول كل شي..
حتى انه ميثوه كانت غايبه امس عن المدرسه لانه اخوها ما خلاها تسير الرحلة ويانا...
مانع من يسمع بسوالفي اللي ما تخلص يعطي السماعة حق فلاح..
وأرد اقول حق فلاح عطني اياه برمسه..
اقووووله منووووع تبا الفكاك مني.. ما عليه..... بس صدقني ما بودرك... (ويلس يضحك.)....


غويه كانت بترد السنه وياي المدرسه..
بس لانه كنا ثاني ثانوي.. كنا لازم نختار علمي ولا ادبي....
عاد انا فجأة فجأة ظهرت عندي ميول طبية... قلت ف خاطري.. (ودمووه انتي لازم تستوين دكتورة..)
وغويه اللي طول عمرها شاطرة.. قالت بسير ادبي...
كل ربعها واهلنا تفاجأوا...
سهيلة كانت كل يوم تحاول وياها ان تسير علمي.. بس ما طاعت.... وقالت احب العربي.. ما ابا ادرس شي ما احبه..

بس انا قتلها
غويه ابا استوي دكتورة...
(ضحكت)......
قتلها غويه.. صدق ارمسج......... ابا استوي دكتورة...

قالت.. دكتورة مرة وحدة.... حلو الواحد يحلم...
قتلها بس هذا مب حلم.. انا ابا استوي دكتورة..

قلت حق ابويه وهو يالس يطالع الاخبار......
ابويه........ حبيبي........ كم وديمة عندك في الدنيا...
(ضحك)....... قال :
هلا هلا غناتي.. الشيخة وديمه ادريبج تبين شي.. يلا قولي قولي بلا قصايد...

قلت وانا مستحيه.......
ابا ادرس طب....

قال: طب. شو بعد هذا يا بنيتي..
قتله ابوي.. يعني بنتك ودامي بتستوي دختورة.....

قال: ما شاالله ماشالله........ ودامي.. بتستوي دختورة.. زين زين...
وما قال شي..

***

.. مانع وفلاح جربوا يوصلون...

ابويه وحامد ساروا المطار يتلقفونهم....
اول ما وصلوا البيت وامايه صياح من الصبح.. وغويه يالسه عالدجة... تصيح... قالت...

هلا باللي لفى قلبي لفايه..
ارحب به واهلي به جهوري
فلاح اللي ضوى بعتمة سمايه
يطيب بشوفته خافي شعوري
وهلا بمانع..
يا بلسم شفايه...
بكاك القلب ايام وشهوري
خويِ في ضميري وفي حشايه
احبه في الغياب وفي الحضور..
هلا يا كل أشواقي ومنايه
فلاح ومانع.. وردي وعطوري...

[سر الحياة]

انا نسيت مانع وفلاح.. وكل ما شفته في هالوقت دموع غويه اللي غسلت بهم كل حرف من حروف قصيدتها...
بدل ما اركض لفلاح ومانع الي مشتاقتلهم موت...
سرت صوب غويه احضنها.. واصيح..

.....هذا قلب غويه الدقيق اللي ما يحمل بداخله غير ورود وعطور وقصايد.. هذا قلبها اللي ما ينبض الا بالحب وبالشوق.. وبكل شي حلو بهالدنيا..... هذا القلب الحلو.. محد تخيل انه مريض..
محد تصور انه بيتعب كل هالتعب اللي خلاها تغيب عن المدرسة سنة كاملة..
كانت غاديه دقيقة.. وابتسامتها العذبة ما تم منها غير لمحة حلوة..
وعيونها الي تغنوا بها كل الحريم.. بدت ذابلة.. ممزوجة بالدموع وبصبغة حمرة ما تفارقها..
غويه... غوية بنت المر.. اللي شفتها في هذاك العيد احلى بنت..
بدت انسانة ثانية..
يصيح قلبك بس لي عرفت كيف كانت.. ووكيف غدت عقب ما مرض قلبها..
آه يا غويه..

.....
..عقب المغرب وصل حامد وعمي ظاهر وام حامد.. وسلموا على فلاح ومانع ويلسنا كلنا في الميلس.. انا وغويه سرنا ويا مانع نسولف عن بريطنيا.. قلناله ودنا وياك.. قالي الصيف الياي..

يا ريت الصيف الياي يوصل بسرعة.. قتله انزين اعتبره الحين الصيف الياي...
ويلس يضحك..

بعد العشا..
يلست انا ويا غويه ومانع وفلاح..
خبرتهم غويه انها بتسير ادبي..
مانع اول شي استغرب... بس بعدين ما قالها شي..و حتى فلاح..
بس..
يوم خبرتهم اني بسير علمي تفاجأوا..
فلاح: وديمة......... بتسير علمي ما صدق.. شو استوى بغيبتنا..
مانع: (يضحك)... والله يا فلاح الظاهر انه الاخت تبا تستوي دكتورة.. (وهم الاثنين يضحكون)..
قتلهم... تضحكون علي ما عليه.... انزين صح.. ابا استوي دكتوره...
قالوا: هاااااااه...... لا.. لا.. الظاهر السالفة فيها خبال يا ودموووه..
انتي عمرج ما يبتي طاري الدكاترة.. شو اللي غيرج..
قلت: ما ادري.. بس فكرت شو ابا استوي... حسيت اني لازم استوي دكتورة ولا ما بدرس...
انزين عااد يلا خبروني رايكم...

ترددوا في البدايه انهم يوافقون...
مانع قال... هيه.. يوم بتخلصين بالاول.. بعدين بنشوف...
فلاح ما قال شي.. بس شفت اشيا في عيونه... تقولي لا... ما كملت سوالف عيونه...
وسرت بعيد...
اول مرة كنت افكر وافكر وافكر.. بس ما حس انه فيه نتيجه....
كنت اشوف نفسي وانا يايبه شهادة الطب.. والكل فرحان فيني.
لكن عقب ارد واشوف صور فلاح وعينه فيها حزن جديم... حزن... ما اعرف اسبابه.. واحيانا كنت اتمنى ان عيونه اتم لغز ما اوصل لحله ابد....
وساعات.... ودي بس اقوله وهو يالس.. لييييييش يا فلاح....
ليش هالحزن..
لكن ما اقدر.....


مانع وفلاح.. ساروا بنا صوب البر...
امايه ما يت ويانا......... بس لانه غويه لزمت تسير... عقب عاد يت..
كانت رحلة ما بنساها..
رحلة شفت فيها الارواح الدقيقة اللي تسكنا.. كيف تمسك بقلوب بعضها... وتحن لكل واحد فينا..
رحلة....... خذتني صوب حلم ما عشته في خيالي..
يوم اشوف كل الزوايا.. تعمرها وجوههم الدافية..
قلنا قصص.. وقلنا سوالف... وقلنا.. وقلنا.. بس ظل الحزن الجديم موجود (في عيني وفي عينه)..

.....ساعة العصر..
غوية كانت تمشي صوب لطعوس.. يوم شفت فجأة ظلالها.. تختفي..
الشمس لعبت بشعرها الاسود اللي كان شرى الشيله اللي طايحه على جتفها..
عيونها الواسعه حضنت كل وميض الشمس..
شفتها حلوة.. حلوة. تخبل... بس كانت دقيقة.. ما تقدر تمشي الا تناهد. وتتعب..
قلت ف خاطري يمكن يلست تكتب..
بس تأخرت....
تأخرت...
_
سرت صوب امايه.. سألتني عن غويه
قتلها...
وينها بعد يا اميه..... اكيد يالسه تقصد الحينه... الله على قصايدها... عقب شوي بسير صوبها...

..يلست اسولف ويا امايه..
قتلها اميه.. تدرين اني بسير علمي.. والعلمي ما شي في مدرستنا..
قالت: شو تبين بعوار الراس يا ودامي.. خليه عنج
بس يوم شافت غيوم الحزن بويهي (ضحكت) .. قالت انزين يا امايه سيري علمي وين ما تبين
قتلها: تهقين ابوي بيوافق.
(سكتت).... والله الغاليه ما ادري شو اقول بس انشاالله بيوافق..

ويوم سرت عند غويه اخبرها.. شفتها يالسة تخط على الرمل رسومات حلوة..
وتمسحهم بايديها..
وخصل شعرها تلثم عيونها...
كانت مثل لوحة صافية..
ممزورة بالغيم.. والصحرا.. والشمال...
كانت قصيدة..
غويه.. كانت قصيدة..

ما شافتني وانا ايلس صوبها.. والرمل تناثر صوبي..
شفتها غييير...
حلوة.. واحلى من قبل بعد..قالتلي بصوتها الدافي..
ودامي... ليش كل شي اشوفه..
اشوفه حلووو.. بس بعيد..
ما فهمت عليها في البداية.!
قتلها.. ليش شو تشوفين يا غويه.. (ابتسمت.. وردت تلعب بالرمل..)
قالت...
أشوف شمس حلوة... ذهبية..
واشوف رمل ذهبي...
وأشوف قلب حلو...
بس....

حرقت قلبي يوم قالت بس..
قتلها.. بس شوو.. (سكتت مرة ثانية)....
قتلها قلب منوه..
بعد ما ردت..
ودموعها تناثرت مثل الماس..
كان منظرها يذبح..، قالتلي خليني روحي يا وديمة.. خليني بروحي..
قمت عنها وقلبي شال خوووف وهم..
كنت احاتي غوية ليل ونهار.. اخاف من اي شي يمر على قلبها.. ويزيد اتعابه..
بس ما قدرت اعرف اللي فيها..
سرت عنها وعيوني ما تفارقها..
مانع وفلاح.. يلسو يرمسون.. سرت صوبهم..
سرت صوبهم وسمعت شي غريب..
اول مرة سمعت فلاااح يقول قصيد..
مانع لاحظني واشر بايده اني اسمع.. وفلاح ما يدري..

قال..
خوف من عمق الخوافي ما يخاف..
يوم يلحظ شوف هالريم الخشيف
ينظم قصايد على موج الكفاف
ويصبح ربيع بدل أيام صيف
يا وله
يا حب
يا عذب الوصاف
توصل أوصافك إلى نجم رهيف
شل بأشجانك تناهيد رهاف
لأجل تبسم كل وردات الخريف...

عقبها شافني.. وسكت.. قال ودموووه.. انتي هنيه....
قتله..... فلااااح دخيلك كمل كمل القصيدة.. عشاني انا..
قال خلاااص خلصت..
قتله.. لالالا.. كمل
وقلبي ذاهل من اللي يسمعه... فلاح.. يقول قصيدة.. وكلماتها تذبح القلب..
فلاح.. حابس بقلبه كل هذا.. ما صدقت حسيت اني عايشه بحلم..

قال.. انزين.. عشان خاطرج بس يا ودامي.. سمعي.. (وهو يضحك)

يا محبي والحنايا بك شغاف
وكل ما ينبض بجوفي لهيف
لهفة تسقي الصحاري والجفاف
تسقي الوديان والورد الشفيف
يا غريمي بك غرام الوجد لاف
روف بالوجدان يا حب عفيف
يختلف القلب لي لاحظك وشاف
كيف يحب انسان ماله أي وصيف

........
لهفات قصيدته.. لعبت بقلبي مثل غيث الشتا..
حسيت بالم فجأة ظهر بداخلي.. مثل جرح جديم..
ما ادري شو استوى بس اللي اذكره صوت فلاح.. وشعره الاسود اللي لعبت به رياح البر..
اما الحياة اللي كنت فيها كااانت تشبه حلم ذهبي.. مثل الشمس اللي تشوفها غوية..

طبعا سرت صوب غويه وقلبي يلهث.. ويضحك..
قتلها .. غويه.. غوووووووووووويه..
تعالي سمعي فلاح.. شو يقول..
يقول قصيدة يا غويه...

وسرنا صوبه مرة ثانية.. وسمعنا اياها اكثر من مرة.. لي ما حفظتها..
ما صدقت.. اللي سمعته..
حسيت بحياة ثانيه..
حسيت بفلاح انسان ثاني.. مب هذاك اللي عرفناه دوم..

غويه يلست تفكر بقصيدة فلاح طول الليل..
سألتها.. غوية..
كيف يكتبون القصيد..
(ضحكت).. قالت.. هيه يا وديمه.. يا ريت كنا نكتب القصيد.. الا هو يكتبنا..
قتلها..
انزين.. وفلاح كيف كتب هالقصيدة..
(سكتت غويه.. وسارت بنظراتها بعيد)
كانت ليلة حلوة..
واحلى ما فيها صور فلاح وهو يقصد..
وصور غويه وهي تخط عالرمل رسوم ناعمة.. وتمسحها..

الصبح وصلت ام حميد.. ويلست ويا امايه تسولف...
شافتني من بعيد.. قالتلي..

ودمووووه.. شحالج جيف انتي.. وينكم امس هاه... شو انتو ما تيلسون في البيت..
اخبرج يقولون غويه بداوم السنه صدق..و..... و...... (ماااا خلصت اسئلتها لي ما يت اميه وسارت بها صوب الميلس)
قتلها خالوه.. وين ميثا..
قالتلي ميثا في البيت.. عاد سرت عند فلاح وقتله وصلني بيت قوم ميثا..
يوم دخلت على ميثا شفت حمود اللعيب (حميد اخو ميثا).. اللي من زماان مب شايفتنه..
قال حق فلاح..منووه وياك..
قتله قبل لا يجاوب فلاح..
يعني ما عرفتني.. هاي انا وديمه.. هيه طبعا نسيت فريجك الاولي.. نسيتنا..
(ضحك)... قال حشى ما قلنا شي..
انتي بعدج يا وديمه... ويا سوالفج... (ويلس يضحك)..

قتله بسير عند ميثا..
ويلس فلاح وحمود يرمسون..

حميد اخو ميثا تغير.. ما شفت هذاك الولد الطايش. اللي يلعب في الفريج ليل ونهار.. كبر وسار الجيش.. وما قمنا نشوفه في الفريج لانه يسير بوظبي طول الاسبوع..

(ويلست اسولف ويا ميثا)
قتلها ميثا الحين شو بسوي.. المدارس بتبدا وانا بعدني ما خبرت ابويه اني لازم انتقل..
قالتلي.. عادي.. قبل المدارس بيوم خبريه.. وصدقيني بيوافق..
قتلها.. ميثوه.. ما تدريبه ابويه.. ما اظن يوافق.. خاصة المدرسة الثانيه بعيدة..

لكن ميثا طمنتني.. وقالت مب مشكله...
قتلها.. طبعا انتي شو هامنج.. بتسيرين ادبي.. لا وغويه يمكن تكون وياج في الصف..
قالت..
صدق... الله غويه بنت المر ويايه.. ويييه منوه قدي.. عقب شو ابابج..

عقب هذاك اليوم...
فكرت بخوف من اللي ياي..
حسيت اني اخترت طريج صعب.. وما ادري عنه شي..
حسيت اني ضايعه.. ومب لاقيه اللي ينورني بكلمة او راي..

خبرت فلاح عن خوفي.. قالي يا وديمة... انا اباج تسوين اللي في خاطرج.. بس.. اخاف من الحياة عليج.. انتي وغويه..
اخاف تصعب عليكم الدنيا.. وتشوفون ايام تزعلكم.. وهذا اللي ما اباج تشوفينه يا وديمة..

كلام فلاح سرى بقلبي مثل برودة الجبال.. كل شي فيه كان رقيق.. وكان من داخل قلبه..
شفت غلاتنا بداخل فلاح..
وشفت في عيونه خطوط الزمن اللي عشناه.. كأنه كل اللي استوى ينعاد وينعاد الف مرة في عيون فلاح..
بس شي وحيد ضاع من عيونه ومن كلامه..
هو كان ضايع.. وما شفته ابد لا بين عيونه.. ولا بين كلامه..

خذت كلمات فلاح ويايه.. ويلست افكر فيها ليالي طويلة...
قتله عقب ايام..
فلاح.. لو الكل عارض اني استوي دكتورة.. انته شو بتسوي..

(ابتسم).. قال ما يحتاي اقول يا وديمة..
ما اقدر اشوف شي تبينه.. وما اسويه...

قلبي فرح.. عرفت انه فلاح الوحيد اللي بيقدر يرمس ويا ابويه.. ويقنعه..

.......

[سر الحياة]

كان العصر..
سهيلة وصلت عند غويه..
سرت عندها اسلم عليها.. قالتلي هاه ودامي غويه تقول تبين تستوين دكتورة.. صدق..
قتلها هيه.. انشاالله..
انزين عيل بتسيرن علمي.. والعلمي ماشي في مدرستنا..
قتلها ما ادري يا سهيلة,, بعدني مب عارفه كيف اخبر ابويه اخاف يرفض..

..اول مرة حسيت أن سالفة الطب شي مهم بالنسبة لي...
تصورت اني اكون شي ثاني.. بس ما قدرت..

سرت بتفكيري بعيد.. يوم سمعت صوت اماية يزقر علي.. وسرت عندها..
هلا امايه خير..
قالت.. توني مرمسة يدوتكم من العين.. تقول مروا عليها.. من زمان مب شايفتنكم..
استانست وايد اني بسير عند يدوه جفله.. من زمان ما يتنا لانها ما تقهر الدرب..
لكن قتلها ابا اسير.. وسرت خبرت غويه..

وعقب يومين..
ظهرنا كلنا جدا العين..
حتى مانع وفلاح قالوا بنسير وياكم.

وقبل لا نظهر مرينا على بيت عمي ظاهر.. ويلسنا عندهم شويه..
وحامد تم يسولف ويا مانع وفلاح.. وقال بسير وياكم جدا العين..

وصلنا عند يدوه جفلة اللي ساكنة فبيت خالي ذياب..
كانت حرمت خالي ذياب.. وبنت خالي عوشة واقفات في الحوي..
سلمنا عليهم.. ودخلنا عند يدوه جفله..
ويلست اسولف وياها.. واخبرها لعلوم... وغويه قالتلها انه فلاح يقصد... سارت زقرت عليه.. وقالتله سمع يدوه القصيده..
ويوم سمعته.. وااايد عيبها..

عقب سرنا حجرة عوشة..
عوشة كانت كبر غويه.. وماكملت ثاني ثانوي وظهرت..
خبرتنا عن اخبارهم.. وعلومهم..
قالت ان ولد خالها بطي خطبها..
غويه قالت زين سوا..
عاد انا ضحكت بصوت عالي.. وعوشة يالسه تشوفني وهي معصبة..
قالت ليش تضحكين..
قلتلها... ها .. لا بس تذكرت بطي اللي في فريجنا.. اخو سعيدان الشيطان.. شفته فوق سقف بيتهم اليوم... (ويلست اضحك بداخلي طول الوقت)

ابويه.. وحامد وفلاح ومانع يلسوا عند يدوه جفلة.. ودخل عليهم خالي ذياب.. وولده غديّر.. ويلسوا يسولفون..
امايه سارت بيت قوم خالتي عفراء.. لانها من زمان مب سايرتلهم..

..عاد وقت الغدا.. بيت قوم يدوه جفله انمزر ماشااالله..
خالتي عفراء وصلت عقب ويا امايه.. وعيالها..

استانست وايد بوجودي بينهم..
كان الوقت دافي..
والسما صافيه.. والعيون كلها كلها مشتاقه..

سرت عند يدوه جفله.. خبرتها اني ابا استوي دكتورة..
قالتلي زين يا ودامي... الله يحفظج..

ووصلت غويه عقب شويه.. وحطت راسها في حضن يدوه جفله.. ويلست تشل بقصيد فلاح..
يا محبي والحنايا بك شغاف
وكل ما ينبض بجوفي لهيف
لهفة تسقي الصحاري والجفاف
تسقي الوديان والورد الشفيف

ويلسنا تالي الوقت. نرمس عن كل شي.

وعقب يدوه طلبت امايه.. فظهرنا من الحجرة..
قالتلها.. سمعي يا اميه سمحة ترى غدير يبا ياخذ غويه.. وانا سمعانه انه ثلاثة يبونها من فريجكم صدق..

اميه قالتلها هيه بس غويه الحين ما تبا.. وبعدها ما خلصت دراستها..
وابوها رد الخطاب الثلاث.. لانه البنيه مريضة.. ومب غاويه عرس..

باجر الظهر.....
كنا يالسين في الصالة كلنا.. يوم خالي ذياب قال حق ابويه جدام غدير وغويه انه يباهم يعرسون..
حامد طلع من الحجرة وهو معصب.. وسار وراه فلاح..
وغويه انفجر قلبها بالدمع.. وعيونها كانت تقول كلاام يذبح.. وظهرت من الصالة وهي محرجة..

يدوه جفله ما عرفت شو تسوي..
وعقب العصر ابويه قال يا عيال بنرد دبي...

كنت صغيره اني ادخل في موضوع مثل هذا بس قلت حق امايه انه غويه يمكن ما تبا تنخطب الحين.. خليها تكمل دراستها عالاقل هالسنة..
بس ما سمعت كلمة لا من اميه.. ولا من غويه..
وطول الدرب ونحن رادين.. كنا ساكتين وغويه ما تجاوب ولا ترمس ولا تقول شي.. وهذا اللي ذبحني..

[سر الحياة]

عقب ما ردينا دبي..
وعقب سالفة غدير وغويه..
يلست غويه ما ترمس طول لاسبوع..
امايه قالتلها خلاص يا اميه.. ما تبين غدير بنخبرهم.. بس لا تسوين في عمرج جذيه.. لكنها تمت ساكته.. وما تيب طاري اللي استوى..

امايه سارت العين ويا ابويه عقب ايام يستسمحون من خالي ذياب.. وخبروهم ان البنت مريضة الحين.. ومن سنة مب سايرة لمدرسة وتبا تكمل..
خالي ذياب حط في خاطره من اللي استوى..
وحتى غدير.. وما ادري ليش عقب هالسالفة بالذات.. ما عاد خالي ذياب هذاك الشخص اللي عرفته..
وغدير.. من زمان كان انسان ما يهتم بحد.. يسوي اللي يباه.. بدون ما يحس بالناس اللي وياه.. وهذا اللي كان ما يعيبني فيه.. وفرحت انه غويه ما طاعت تاخذه.. (بس ما خبرت حد اني فرحانه)

***

عقب اسبوعين..
فلاح ومانع كانوا بيردون يسافرون...
بس اللي استغربته شي واحد.. هو حامد..
اللي ما قمت اشوفه يمر علينا البيت... ولا يظهر ويا فلاح مثل دوم..
ما ادري شو استوى..
بس سألت فلاح عنه..
قال.. ما ادري يا وديمه.. كل ما اقوله ليش ما تمر علينا البيت يقول مرة ثانيه..
وحتى ليلة سفرهم وصل متأخر.. وما كن حامد هذاك اللي يضحك.. ويسوي سوالف..

سرت صوب مانع وهو يزهب اغراضه.. قتله مانع.. شو فيه حامد.. ليش فجأة تغير..
قالي ما ادريبه.. ليش ما تسألينه روحج..

وساعة سفرهم..
غويه صاحت بشكل غريب في حجرتها..
قالتلي.. خليني يا وديمة.. ما ابا اشوف حد.. ولا ابا اسلم عليهم وهم بيسيرون..
بس فلاح دخل حجرتها.. وقال مب مسافر قبل ما تضحك غويه.. وتسلم عليهم..
وتم يالس هو مانع عندها لي ما سكتت.. وقالت خلاص مب صايحة.. بس لحقوا عالطيارة لا تفوتكم..

اشتقت حق مانع وفلاح.. حتى قبل لا يظهرون من البيت..
حسيت بفراغ كبير بيني وبين نفسي.. ما عرفت اسبابه..
وغويه.. تغيرت..
عقب ايام ردت روحها الحلوة.. وردت سوالفها.. ويلستها ويا امايه عقب الضحى..

حتى سهيلة..وفطيم يوم سمعوا انها مضايجه كانوا يزورونها.. ويلسون عندها..
وردت غوية مثل ما كانت.. ونست سالفة غدير..

وبدينا نجهز حق المدارس.. خاصة ان غويه بترد المدرسه..
امايه كانت فرحانه وايد انه غويه مستانسه.. وردت مثل ما كانت. ونست الي استوى قبل فترة..

وانا.. كنت شاله هم كيف اخبر ابويه سالفة المدرسة.. كنت خايفة انه ما بيوافق..

وقبل اسبوع من المدرسة سرت صوبه وهو يالس يسولف ويا امايه..
يلست قريبه عنه.. واضحك وياه.. قتله ابوي.. خبرتك ان بنتك ودامي بتسير علمي..

قال.. هيه اذكر خبرتيني.. برايه سيري علمي..
بس ابويه..
مدرستنا اللي هنيه.. ما فيها علمي.. لا زم اسير المدرسة الثانية..
.............

_

قام ابويه من مكانه.. وشافني بنظره غريبة..
قال..
يا وديمه.. كنت دايما اقول الي يبونه البنات بسويلهم اياه.. اللي يبونه...
بس هالمرة.. ما اقدر اشوفج تسيرين بعيد.. ومب ويا اختج.. في منطقة ثانية..
ما اقدر يا وديمة..
واذا هذي الدراسه اللي تطرينها.. مب لازم.. بلاها..

صحت بقلبي.. قبل لا اصيح بعيوني..
قتله بس ابويه.. (قطع علي)..
يا وديمة.. من خوفي عليج.. بس من خوفي.. ما اباج تسيرين بعيد..

هذاك الوقت بس فكرت بنفسي.. ما فهمت اللي يباه ابوي.. كان في داخله خوف علي.. قبل كل شي..
لكنني تميت زعلانه... لايام... وقلت حق كل حد يرمسه.. بس ما طاع..

حتى يدوه جفله اتصلتبها ... عسب ترمسه.. بس ما شي فايدة..

وقلت لازم اتصل بفلاح ومانع.. واخبرهم..
فلاح قالي بصوته اللي حسيته به زعلان عشاني..
قال..
ما عليه يا وديمه.. صدقيني بيرضى.. بس لا تصيحين.. ترى صدق برد لبلاد.. بس عشان دموعج..
ضحكني فلاح برمسته.. ولمست بنبرة احساسه شي غريب..
غويه كانت يالسه قريب.. قتلها تعالي رمسي فلاح.. بس ما ادري ليش سارت بعيد قالت مرة ثانيه.. ما ادري...
المهم.. رمست ويا فلاح وسولفت وياه.. وقالي انتي سيري المدرسه ويا غويه الصبح.. ومن هناك سيري ويا الباص المدرسة الثانية..
قتله.. وابويه..
(سكت شوي. وقال) ابوي عقب فترة خبريه واكيد ما بيقول شي..

قتله صدق فكره... خلاص على رايك.. انشاالله بس تنجح..

..ويوم خبرت غويه وامايه.. ما قالوا شي.. ويلست اتريا الايام اللي تبدأ بها المدرسه..

....
ميثا مرت علي العصر..
وخبرتها عن السالفه.. اول شي تمت تضحك.. بس يوم قلت انه فلاح راعي الفكرة.. قالت فكرة فنانة.

***

اول يوم مدرسة..
كنت متزهبة من وقت وحاشره غويه انها تتلبس وتظهر..
كلهم يعرفون شو السالفة.. الا ابويه.. حليله..

المهم.. سارت غويه تتريق..
قتلها غوايه ماشي وقت.. يلا يلا انا مستعيله..
وسرت صوب ابويه..
ازااعج. ابويه تاخرت.. ابا اسير لمدرسة.. ابااااا.. بسسسرعة بسسرعة..

ابويه سار صوب اميه.. يقولها..
ام مانع.. اش بلاها ودامي.. اول مرة اشوفها تبا تسير لمدرسه. مب شرات اول.. يوم تغيب اول يوم..

(ضحكت اميه).. وقالت.. والله يا ابو مانع الظاهر انه بنتك تبا تتشطر السنه..

قتلهم من بعيد.... انزييين الحين استعيلوا.. ابا اسيييييير..
وسرت صوب غويه.. وخذت دفترها.. وركيض صوب السيارة..
وشغلتها.. وشغلت المكيف.. وبديت اضرب (هرنات) لي ما حشرت الفريج كله.. حتى ام حميد ظهرت وهي تتحرطم..

.........
في المدرسة..
وصلت ويا غويه.. ووقفت وياها ارمس لي ما سار ابويه ..
عقب قتلها.. غويه... يوم بترجعين الظهر.. خبري ابوي ان صفنا بيتأخر..
وانا الحين سايرة ويا الباص اللي بيسير لمدرسة الثانية..

(ضحكت غويه).. وهي تقول.. الله يعينج اذا درى ابوي..

قتلها يلا عااد.. لازم تشجعيني.. المهم.. يلا فمان الله..

وسرت ويا الباص..

ودخلت لمدرسة اليديده.. وحسيت انه الحياة تضحك.. وتبسم.. وفيها حلمي اللي تمنيته..
كنت خايفه.. اني اخترت الطريق الصعب..
بس.. فرحااانه بداخلي.. اني غامرت.. وبديت رحلتي الطويلة..

.. يلست قريب الدريشة.. كنت ابا اشوف حياة اليوم كيف تمضي.. وانا يالسه قريب اودعها بعيوني.. وبقلبي.. وبـ.. بثواني حياتي اللي ما عرفت وين تاخذني..

...يلست وياي وحدة مااعرفها.. كانت شايفه عمرها.. حتى انها
ما سالتني لا عن اسمي ولا عن شي..
المهم.. انا ما زعلت ولا حتى فكرت فيها..

لكن.. اللي ما عيبني اني ابدا السنه.. وحذالي وحدة مب طايقه عمرها..
عقب الظهر..
رجعت غويه بالباص بدوني طبعا..
قالت حق ابويه انه صفنا بيتأخر..

وانا يالسه في الباص الثاني.. واحاتي الوقت..
بس يوم رجعت.. قلت حق ابويه.. الله يا ابوي محلاها المدرسه..

(استغرب) ... قال زين يوم تعيبج.. هاه ما تبين تغيربن الصف وتسيرين عند ربعج.. مثل كل سنه.
قتله..
لالالالالا.. مشكووور ابوي الصف فنان...
وسرت بسرعة قبل لا يسألني عن اشيا ثانيه..

.......
وعلى طول سرت اتصلت بفلاح..
قتله.... فلاااااااااح.... تسلم تسلم عالفكرة... تصدق ابوي لي الحينه ما حس..
. مانع خذ السماعة...
هااه ودامي.. خبريني شو سويتي اليوم.. مغامرات يقولون..
قتله.. وانا مستانسه. هيه يا مانع.. لو تشوف وديمه.. وهي تمثل اونها سايرة مدرستها الصبح..
يلا فاتكم...

....ومرت سوالف.. وسوالف... وفلاااح. .رمس.. بس.........
بس كان بعيد.. يسمعني.. ولا كأنه يسمعني...
موجود.. وغايب.. و.. و مادري.. تعلقت بآخر همسة من صوته..
لي سار.. واختفى..
ويلست ويا كل العمر اللي كان.. ورديت لحلمي.

[سر الحياة]

***

عقب العصر..
يلسنا ويا امايه.. وخبرناها عن لمدرسه..
وعن مدرستي اليديده..
غويه.. خبرتني انا ميثا وياها في الصف..
عاد انا سويت عمري زعلانه.. وقلتلهم.. اووه ذكرتوني بوحده يالسه وياي...
غويه (تضحك) ليش شو فيها...
قتلها.. اوووه خليني ساكته .. اخير..
(ضحكت مرة ثاانيه.. بضحكتها العذبه)
لعبت بشعرها ريح باردة.. يت من بلااد بعيدة.. من صوب (قلوب).. غايبه..
ولعبت بقلبي.. (قوافي قصيدة فلاح).. و..... ذكريات شاردة..

..قلت.. وليتني ما قلت..
هيه.. متى بس بيرجع مانع.. و..
غويه كملت...... وفلاح..

.. ولفانا صمت طويل..
ما عرفت افكر.. غير بشي واحد.. غزى قلبي فجأة..
خوف.

..وعلى غفلة.. وصلت مرت عمي ظاهر.. وسلمنا عليها.. واول شي سألتها غويه..
خالوه.. وين حامد... ماله شوف...
(ما عرفت ام حامد شو تقول).. قالت يا بنيتي ما ادريبه..
تعرفين من سافروا الاولاد وهو مضايج..
بس انشاالله يخطف قريب صوبكم..
وخذتنا السوالف..

... وعقب ودرنا قوم امايه.. وسرنا صوب الحجر..

هنيه رن التيلفون...
سرت اتلقاه.... كانت عوشه بنت خالي ذياب..
رمست وياها شويه.. عقب قالتلي.. هاه بنات عمتي.. جاهزين حق عرسي ولا..

قتلها وانا اقول ف خاطري (والله متفيجه)...
يا عوشه عرسج عقب خمس شهور.. شو نسوي من الحين..

قالت برايه.. لازم تستعدون..
قتلها انزين البنات عندكم زاهبات..
قالت... اووووه من بداية السنه وهم متعبلات.. مب شرات (ناااس)
قتلها انزييين... يلا مبروك مقدما.. وصدقيني ما نسينا.. بنبدا من الاسبوع الياي.. خلاص...

غويه سألتني منووه وياج..
خبرتنها سالفت عوشة.. عااد تمت تضحك غويه..
قااالت شو فيهم ما صدقوا حد بيعرس...

وسرت عند امايه خبرتها اللي قالتلي اياه عوشه.. عاد خبرتني ام حامد انهم بيبدون يتجهزون بداية الشهر الياي...


...المهم..
سرت صوب غويه.. قتلها......
اخبرج.. اش بلاه حامد... ماله شوف..
(ردت غويه وهيه تشوف بعيد..... ومحتااارة..)
قالت.. ما ادري يا وديمة.. ما ادري..

نسيت سوالف حامد وعرس عوشة......
وحبيت اني استانس بالايام اليايه..
حبيت احسس خفوقي بالفرح.. بشعاع الفرح..

...شي غريب صاب غويه بعد ايام..
عيونها الواسعه.. لفتها هالات حزن..
وطافت بها دموع لامعة..
ما عادت غويه اللي عرفتها..
حتى انه ابوي وداها المستشفى..
وعطوها حبوب زيادة.. غير الي تاخذهم حق قلبها..
قالتلي..
آه يا وديمة... ذبحوني هالدكاترة.. وذبحتني هالحياة.. وذبحني..........؟؟ (ما كملت)
كان صوتها دافي..
ونظرتها حااالمة...
حلوة.. رغم مرضها اللي ياكل قلبها....
حلوة.. يوم تشوفني من بعيد.. وتضحك..
ويوم تغني.. وتشل بالقصايد...
وساعات.. تكتب تحت ظل الغاف.. ويلعب شعرها الاسود الغاوي..

..وفي ليلة
شفت نثور غويه.. قريب سريرها..
جاسني خوف قبل لا اقرا اللي كاتبتنه..
كاتبة..
وإذا مرت ليالي الصيف..
على هالقلب..تمضي كيف
ولي أمست دموع الروح
تعاني من هوى هالضيف
وإذا مرت صباحات الندى..والشوق
ما بين الدمع والإحساس..
وتمضي في صفا الأنفاس
غريبة...بين كل هالناس
وإذا مريت في ليلك..
ألا يا ليت تذكرني
وإذا أمسيت في عينك..
عشيري لا تعذبني..
غريب الحب..يمضي في هوى دربك
ويسري بين أشجانك
تغيب..ترحل..وتضوي
وبقلبي يبقى عنوانك..

...... وبقت عنواين كثيرة معلقة بقلبي.. مثل حروف قصيدتها..
انتفضت من الشوق.. والخوف.. ومن غويه نفسها.
من اللي تقوله.. يذبحني..
ودرت قصيدتها.. وسرت بعيد.. بعيد.. أتلقف هوى بارد يعيد الحيا فيني..
وحبست دموعي..

وتذكرت ....
فجأة... شي غامض.. بدا يخفق بداخلي مثل الوان القمر..


***


مرت ايام المدرسة الاولى..
ابوي ما عرف اني ما اداوم ويا غويه.. وتعود اني ارجع عقبها..
وامايه.. ما ادري.. كنت مضايجه من شي... بس ما خبرتنا..

***

يلست ويا امايه في ليلة دافية..
قتلها اميه..
لو كل لعيون تصيح.. بقدر اتحمل..
الا عيونج.. ما اقدر اشوف دمعتها..

..ما ادري.. قالت لي شي.. ما تعودت اني اسمعه..
بس.. قالتلي اياه.. وانا مرعوبه....

قالت.. وديمه..
انا من يومين مهمومة بسالفة.. ما تصورت انها بتوصل بسرعة..

شفتها.. وقلبي بدا يزيد خفوقه.. قتلها خير يا امايه..
قالت..
بسرعة يا وديمة.. كبرتوا..
وغويه خطبوها.. وما طاعت..
والحين...
والحين في واحد يبا يخطبج..

قتلها وانا واقفة مكاني.. ودموعي بدت جارية شرى الوديان في عيوني..

امااايه.. لا.. انا بعدني.. ابا ادرس.. انا ابا.. اناااا...
وبديت اصيح.. واشوف الدنيا ذابلة...
وقلبي اللي تعود يلعب بكل شي.. كان منزوي بزاويه بعيدة بعيدة..
زعلان من الناس.. ومن الدنيا.. حتى زعلان مني..

وقررت اني ازعل عن العالم.. كله.. وما بغيت اشوف حد..
و ما داومت المدرسة في الصبح التالي..

تميت ايام.. وايام..
امايه تقولي يا بنيتي.. اختج رفضت تعرس مرة..
واخاف انتي ترفضين.. والنااس يرمسون.. و..
يا بنيتي يمكن اللي ياي هو اللي بيسعدج..
قتلها لا يا اميه.. اكيد اذا عرست ما بقدر اكمل. ولا اشتغل دكتورة.. لا يا اميه.. لا..


غويه يلست وياي طول الوقت.. ايديها بيدي.. وتلعب بشعري.
. وتمسح عيوني.. اللي جافها الرقاد..
وملت السهر..
وملت دموعها.. وملت شوفة الحياة تمضي بطريق غير اللي حلمت به دووم..

قلت يا غويه... دخيلج رمسيهم..
انا ما ابااا.. مب الحين يا غويه لااا..
وصحت في حضنها مثل طفله. فقدت لعبتها..
ويلست طول الليل.. ساكته.. غويه تمسح دموعي..
وانا غافلة.. ولا اعرف شو بسوي بالايام اليايه..

....

اتصلت بعمي ظاهر.. قتله تعال يا عمي ... تعااال.. ولا بموووت...

الايام خنقتني... حسيت بضياع جرفني صوب سنين غامقة.. غيومها سودا..
وبحرها هايج..

...عمي ظاهر.. بوصوله.. وشوفته حسسني اني بقدر انسى اللي استوى.. وارد لحياتي.. واحلامي..
قالي لا تحاتين يا ودامي..
ابوج خليه علي.. برمسه.. بس ما ابا اشوف دمع وديمتي.. يسري..
ولا ابا اشوف قلبها يصيح...

ابويه عقب العشا وصل حجرتي ويلس قريب..
يلست اجلب بكتب المدرسة ولا كأنه شي مستوي..
سكت.. ويلست ساكته.. ..

عقب شوي...
قال بنيتي يا وديمة.. انتي وغويه.. اغلى اغلى شي عندي..
ومستحيل اسوي اللي يمكن يضر بكم.. او الي ما يعيبكم..
بس يا وديمة يوم شفت انه الياي انسان فاهم.. ومنا فينا...
تمنيت ان هذا اللي بيسعدج..

صحت وانا سايرة صوبه.. وبغيت اقول كلمة.. بس ما قدرت..
ما رد علي.. وقال انشاالله اللي فيه الخير بتحصلينه.. وظهر.. وخلى فراغ بقلبي كثر البحر..
وآه من هذا البحر..
..........
.................
وطافت ليلة حسبت انها بتم عالقة في مكانها للابد...
طافت.. وطافت بها الاشواق.. والذكريات..

تذكرت ماانع.. كنت ابا اركض صوبه وانسى كل اللي استوى...

[سر الحياة]

تذكرت فلاح.. تذكرته بكل تفاصيله..
يوم يدخل البيت.. ويزقر بصوته.. "هل البيت. هل بيت.. فلاح ياكم..."
ياليته يوصل الحين.. ياليت اشوفه.. وانسى هموم دنيايه وشقاها...

تذكرت.. يوم سرنا البر وكنت عطشانه.. وما لقيت اللي اشرب به الماي..
مد يديه.. وخذ غرفة من الماي.. وسقاني..
فلاح.. اللي عينه ترمس حزن..
كانت بروحها تداوي جروحي..

سرت عند غويه.. قتلها ابويه يا غويه ما ادري شو رده..
(وصحت صياح قطع قلوب هل البيت)
وحتى الهندية اللي تشتغل عنا يت صوبي.. وهي تهمس (وديمة لا تصيحين)....
............

.. غويه قالت..
بس يا وديمة...
انتي لي الحين ما عرفتي منوه اللي تقدم لج.......
..............؟!؟!؟



هنيه شفت غويه.. ونسيت كل اللي كنت احاتيه...
نسيت دموعي.. ونسيت كل شي........ وخفت...
خفت من اسم هالانسان اللي انا ناويه ارفضه...
خفت اسمه يتم عالق بقلبي.. وما اقدر انساه...

وعقب شوي.. قالت.... يا وديمة.......... حميد ولد ام حميد هو اللي تقدم لج...

قتلها,, وصوتي كله ذكريات ....... حميـــــــد...
وفجأة تذكرت العمر كله.....
كل اللي مر علي من ايام طفولة.. وايام يوم اشوف حميد يمشي في الفريج ونسميه حمود اللعيب..
وتذكرت فلاح... يوم اخبره من اول يوم عن حمود اللعيب قتله ( هذاك اللي يمشي حمود......حمود اللعيب... )

تمنيت اي واحد اقوله لا... الا حميد....
لكن ما قدرت ارد لا على روحي.. ولا على غوية...

وحسيت اني سكت فترة طويلة... زمن بكامله....

ومرت ليلة غريبه... ما ذاقت جفوني النوم بها..

وردت علي قصايد يدوه جفلة..
ردت سريعة.. وحالمة...
واسمعها تطوف في كل زاوية من زوايا البيت واركانه...

وهي تقصد..
أرى يا سيد فرقاكم علينا هم وانكالي
وتوحش عقبكم لاوطان لي طولتوا الغيبة
وانا من عقبكم يا زين كني في خلا خالي
ويا سعد الليالي يوم يدني الشمل تجريبه



وماادري.. رديت وديمة اللي كنت اعرفها من زمااان...
حسيت بها تخفق بداخلي من ايديد....

الله يا زمن



***



تالي الضحى..

وصلت ميثا البيت تنشد عني..
اهنيه جاسني خووف.. ما عرفت كيف اجابلها واخبرها اني ما ابا حميد..

وسرت صوب حجرة اميه قبل لا تشوفني ميثا.... قتلها..
ليش يا امايه ما خبرتيني انه اللي يباني حميد..

قالت حميد حاله حال اي واحد,,, اذا انتي ما تعرفين الاسم سويتي اللي سويتيه.. كيف بالاسم.. كنتي بتخبلينا..

رديت حجرتي.. وشفت ميثا
.. تقول هاه.. يلا خبريني اش رايج بحميد..
يلست ساكته... وهي تحاول ويايه.. بس ما شي فايده..

بعدين.. رديت عليها بحزن.. قلتلها يا ميثا مهما استوى.. بتمين ربيعتي..
لكن اخاف اللي اقوله.. يبعدنا...
يا ميثا حميد ما يعيبه شي ولا انتو..
لكن...
وصدقيني حميد يستاهل اللي احسن عني يا ميثا..
لكني ما ابا اعرس الحين...


وقفت ميثا وعيونها دامعة.. قالتلي يا وديمة حميد من شافج المرة الاخيرة ..ما عنده طاري غير اسمج..
ما يرمس او يسولف الا عنج..
..

ما قدرت اشوف عيونها..
ولا قدرت اسمع شي ثاني عن حميد..

وظهرت ميثا بسرعة صوب بيتها..
وخلت بقلبي غصة ما ادري لي متى بترافجني..



عمر بدا يطوف مثل طيور العصاير ....

وهنيه... نسيت سالفة حميد.... ونسيت كل شي..
وشفت الجو الغاوي.. اللي ينشر مراحب باردة في الحوي...
وسرت عند غويه اخبرها باللي استوى..

___


كان الوقت شتا..
والدنيا مواجع وغيوم...

وكنت ساهية... وخاطري محزون....
وفجأة ياني صوت من امايه يزقر....

ودييمة.. ودامي..

تعالي فلاح عالتيلفون...

وانمزرت الدنيا افراح وتلاحين..
فلاح..
فــــلاح...

فلاح اللي يعرف حتى متى يتصل .. كأنه يحس بوديمة... وروحها..
سرت صوب التيلفون وقتله وبدون مقدمات...

تحلا سواليفك على جالي النار
ولا حكيت بهمس تحلا السواليف
كلك عتب او لوم.. او كلك اسرار
وفي كل حرف تنطقه شي ماشيف
من صمتك اللي يحترق فيني اغار
يمكن يصير الحكي للهم تخفيف
للحين ما مليت غربات واسفار
ياللي تنادي لك قلوب المواليف
دنياك بحر وانت بالبحر بحار
وانا: اللي تاهت من اسيافك السيف
خل الشقا والناس من حولك كثار
قلبك يضيفهم.. وخلانك الضيف
واللي يحب النار.. ما يطفي النار
وفي كلمتين اقولك: تشتعل كيف

......... ومراحب بالضيف

واسمعه يصفق...
قال.. بالمهلي... بالشاعــــ..
قتله لالالالالا بب شعري انا.. بس حافظتنه..

قال.... تسلمين يا وديمة.. تسلمين..
لا تقولين انكم متيمعين على هوى النار..
وتقصدون..

قتله.. ((( وتشتعل كيف))) يوم انه فلاح ومانع.. بعاااااد..

قال... بس قراااااااب

وضحكنا..

قتله اخيرا اتصلت....

ليش اخيرا .. آخر مرة اتصلت من ثلاث ايام...

هيه.. بس يا فلاح.. ثلاث ايام مرن على وديمة دهووور...

قال.. لالا.. عيل اكيد شي مستوي .. يلا خبرينا..

قتله.. وصوتي مخنوق.. وابا اهد لدموع.. بس ما قدرت..
قتله.. لا تحاتي يا فلاح... وديمة .. بعدها وديمه...

ما رد فلاح.. ولا أنا عرفت ليش قلت اللي قلته...

وسكتنا..
... ويت امايه صوبي قالت هاتي السماعة برمس فلاح...

***


في المسا ابوي عرف باللي قلته حق ميثا..

كنت يالسه ويا غويه... في الحجرة..

يوم دخل وقال يا وديمة... انتي ما حد يروم عليج..
لكن شو بسوي يوم هذا اللي تبينه.. ما اقدر اقول لا..

ضحكت وسرت صوبه احبه على راسه..
قتله يا بويه... يعني هان عليكم تسير ودامه من البيت..

قال والله ما يهوون علي..

وغويه .. سرحت.. ولا كأنها يالسه ويانا...

هنيه.. يت امايه تخبرنا انه يدوه جفله يايه عدنا اسبوع...

عاد ما تحملت الفرح.. وقلت... غويه.. غويه.. زهبي القصايد..
وامايه زهبي مكان الضو.. وابويه هات وياك باجر سح بنسوي ويا ه بثيث..
وحتى الهندية قتلها تعالي الحين نسير ننظف حجرت يدوه جفله...

وعقب شوي.. البيت صخ البيت.. وكلهم يشوفوني.. مستغربين..

قالتلي امايه.. والله يا ودموووه استويتي حرمة البيت..

وضحكنا...



..... رد الضحك.. وردت الغربة تسكنني
............رد الضحك..بس.. ما ادري.. تالي هالضحك


__

[سر الحياة]

كنت أحسب الليل.. وأحسب دقات قلبي
ويرقد الليل...
بس ما ترقد الدقات.

وصل صباح حسبت إنه ما بيوصل الا بعد سنين وسنين..
صباح.. خفت إنه يوصل..
وفكرت كيف بيوصل..
وإذا وصل.. ما عرفت كييف بستقبله..

امايه كانت واعيه من غبشه..
يالسه في الحوي تخبر الهندية شو تسوي..

وأنا سرت صوب حجرة يدوه جفله...
وخذت المدخن وسرت أزيد الضو..

وفجأة شفت غوية خاطفة صوبي.. قايمه من وقت مب مثل عوايدها..
وبيديها شي مثل رسالة.. بس ما انتبهت.. وقلت اكيد ورقة من اوراق غويه..
ما دريت انها هي نفسها الرسالة اللي بقراها عقب سنين.. وبكشف بها اشيا كثيرة..

قلتلها غوية شحالج.. عاش من شافج... وينج ما تبينين هالايام في البيت...

ما ردت... ولا ضحكت...

عقب قالت..
وديمة.. متى بتوصل يدوه جفلة..

قتلها مااردي..

وسارت.

قلبي نغزني..
غويه صوتها متغير...
وكلامها غير..

سرت جدا اماية..
اميه.. متى بتوصل يدوه..

ماادريبها يا بنيتي .. على كلام خالكم الضحى بيوصلون..

وشفت ابويه واصل.. ووياه كراتين فواكه وخضره.. واشيا كثيرة..
عاد سرت صوبه.. احبه على خشمه..

قتله ابوي.. حمدالله عالسلامة.. عاد انا تو صباحي بدا يوم شفتك..
(ضحك).. وقال ... والشيخة سمحة.. صباحها متى بدا..

قتله بسرعة..
شوف عاد يا ابويه..
دام نشوفك انته وامايه ... ايامنا كلها صباح في صباح..

قال...... غلبتيني يا وديمة.. ما انروم عليج..
صح توني راد من بيت عمكم .. سرت انشد عن حامد.. من مده ماله شوف..

((وانا كنت بقول هيه صح.. بس خليت الكلام فخاطري.. وسكت.))

........
وكمل ابويه كلامي..
قتله انه يمر اليوم هو.. ويا عمكم.. ويتغدون عدنا ويا خالكم ذياب..

عاد هنيه ما سكت.. قتله:

انزين شو قال انشاالله بي...

ما ادريبه يا وديمه.. انشاالله..

وشفت غوية صوب الممر راده بسرعة حجرتها.. عقب ما سمعت كلام ابويه..

وسار صوب امايه يسولف وياها..

..غويه كان فيها شي متغير..
ما عرفت شوه.. بس حسيتبه..

المهم.. خطف الصباح..
ووصلت يدوه جفله.. وخالي ذياب..


***

سلمت انا ويا غويه على خالي ذياب.. وعقب سار جدا الميلس ويا ابويه..

عقبها
....شفت يدوه جفله.. وبدت دموعي تهطل شرا المطر..
ما قدرت ارمس.. سرت صوبها.. وكأني من سنييييين ما شفتها..

ووصلت غويه.. وهي تقول بصوت يقطع القلب...

أرى يا سيد فرقاكم علينا هم وانكالي
وتوحش عقبكم لاوطان لي طولتوا الغيبه

وهنيه حتى غويه بدت تصيح..
وعيونها الحلوة.. انمزرت دموع.. وخوف..

عرفت انه بخاطرها شي... بس.. ما دريت شو هو..

وسرنا صوب حجرة يدوه نسولف وياها ونرمس عن هل العين.

امايه سارت عند قوم خالي في الميلس..


قتلها يدوه.. متى.. عرس عوشة...

قالت قريب.. عقب شهر..

واهنيه قمت من مكاني صوب امايه.. ازقر عليها..

اماايه.. امااايه..

هاه وديمة.. خير..

اماايه.. عرس عوشة عقب شهر.. ونحن للحين ما زهبنا شي..
تدرين يا اميه لو درت عوشة بتحشرنا.. وبتسويلنا سالفة..

قالت.. خلاص من باجر بنسير نتزهب.. الحين سيري عند يدوتج وخليني اسير اشوف الغدا..

وفي طريجي سمعت التيلفون اللي في الصالة يرن.. قلت مب وقته ارد..

لكنه تم يرن..

عاد سرت اتلقاه.. كان فلاح عالخط...

مرحبا وديـــمة

قتله.. منوه..فلااااااح مرحبا ملاييين..علومك.. شحالك.. وينك..

(ضحك).. قال يا وديمة صبري علي.. خذتينا بشراع وميداف..

قتله لالالا مب صابرة.. خبرني عنك.. شو تسوون هالايام.. ومتى بتردون..

انشاالله قريب.. وديمة اليوم وصلت رسايل البيت..

قتله.. ما أدري ما أظن.. تبا أسأل غويه..

قال.. لالالا برايه.. بس لأنه في رسالة حد بيطرشها حقي الظاهر ما طرشها.. خلاص انسي السالفة..

قتله برايك.. وكملت وياه سوالف وخبرته عن خالي ذياب ويدوه جفله..

وخذنا الوقت.. لكن الوقت ويا فلاح.. له طعم ثاني..


***


وقت الغدا وصل عمي ظاهر وحامد وياه.. وحتى ام حامد يت تسلم على يدوه جفله..

شافني وشاف غويه كنا في حجرة يدوه يوم دخل يسلم عليها..

شي تغير يوم تلاقت نظرات غويه ونظراته..

ما قدر يرمس.. أو يضحك.. حتى ما أذكر اذا سلم على يدوه ولا لا..

كل اللي شفته.. غربه كبيره تسكن هالروحين.. لكني ما عرفت اسبابها..

المهم.. سار الميلس عند خالي ذياب.. وانا وغويه سرنا صوب عمي ظاهر نسولف وياه..
يوم شافني.. قال (وديمتي) شحالها.. والغاويه بنت المر مستويه عرووس...

كانت غويه متغيرة وايد عن قبل.. أحلى وأحلى..
حتى ان امايه تقولها ما تظهر جدام الغرب يوم يزورونها..

عقب ما تغدينا..

حامد بغى يظهر.. وشافني عند الحوي سايره صوب المطبخ..
قالي وديمة.. قبل لا اظهر.. بغيت توصلين اللي بقوله حق غويه.. بس مب تنسين ضروري.. قتله قول ولا يهمك..

قال.. خبريها انه حامد يقول:

بسألك عن شي خافي ما يبين
في نثور النفس يبكي بالتياع
شي بحجم الكون لكنه دفين
تكشفه اعيون صاحب هالمتاع

قتله شو يعني..

قال.. بس انتي خبريها.. وما عليج..

وسرت صوب غويه قبل لا أنسى هالبيتين اللي خبرني اياهم حامد..

كنت ابا اعرف شو السالفة.. الظاهر انه كان سر.. أو لغز.. المهم خبرت غويه البيتين..

وهي تسمعهم ودموعها الغاليه تعلقت برموشها..

آه يا ليتني ما خبرتها.. كان منظرها ترف له الروح...
قلتلها يا غويه شو فيهم هالبيتين.. خبريني.. وليش حامد وصاني اخبرج اياهم..

ما جاوبت.. وسرحت بعالم ثاني.. ما قدرت اوصله..
ويلست انا قريبه منها.. والأحزان تذبحني..


***


مر اليوم.. والحزن باقي مكانه بين رمشي والخفوق..
والآهات تنتشر بقلبي مثل الأريام السارحة..

أفكر في غويه.. وفي اللي قاله حامد (شي بحجم الكون)
ما عرفته.. ما كنت افهم بالشعر ذاك الزود..

كنت ناويه اخبر يدوه جفله.. بس هونت..
ما عرفت شو اسوي..
وفي ظلمة الليل.. غويه كانت يالسه عالسرير... وفي عيونها كلااااام غزير..
كانت تفكر..
وما تحس بالناس والدنيا..

حلوة... .بس بعيدة.. بعيــــــــدة...
شرى نجم سهيل..
تبرق للحظة.. وتختفي لسنين..
........

وأنا سارحة بروحي.. وردت بخفوقي تلاحين جديمة..
ردت قصيدة فلاح اللي سمعتها منه على غفلة..
ردت وردت ذكرياتي كلها.. في لحظة..

ينظم قصايد على موج الكفاف
ويصبح ربيع بدل أيام صيف
يا وله يا حب يا عذب الوصاف
توصل أوصافك إلى نجم رهيف
شل بأشجانك تناهيد رهاف
لأجل تبسم كل وردات الخريف

[سر الحياة]

.........فجأة ذبت في الحزن..

تذكرت فلاح..

فلاح اللي يداوي جروح الروح..
فلاح اللي يضوي ليلة الأحزان.


تذكرت هالبيت اللي ما يتنسى..

يختلف الحب لي لاحظك وشاف
كيف يحب انسان ماله أي وصيف

كان فلاح بروحه انسان ماله اي وصيف
....
وردت غويه فخاطري...
ردت آلامها.. وأحلامها.. وقصايدها..
ردت أشواقها.. وصورها.. ردت تخفق بداخلي مثل خفوق القلب..

وعذبني الليل بطوله..
وعذبني الجو بسكونه..

وتمنيت وصول الشمس.. لأجل أنسى كل هالمواجع..


***

تالي الصبح..
سرت صوب يدوه جفلة اسولف وياها..
وفجأة سمعت غويه تزقر علي.. عاد سرت اشوف شو تبى..

قالتلي وديمة..
لازم تشوفين حامد وتخبرينه اللي بخبرج اياه..

قتلها انزين قولي..

لكنها سكتت شوي.. عقب قالت..
بس يا وديمة.. لا تخبرين حد..

قتلها انزين.. فالج طيب.. بس خير..

قالت ردي عليه وخبريه انه غوويه تقول:

حي بأصحاب الوفا الواصلين
بالنشود وبالتحية والسماع
سألكم لو هو مخفى يستبين
وان تناثر فوق قلوب خشاع
هو (الحب) اللي يخاوي المحبين
وإن خفى تظهره اعيون وساع


خفت من كل حرف من حروفها...

وكنت ناويه أسأل بس قبل لا انطق بشي قالتلي .. (اشششش........ تعالي بخبرج)


وسرت وياها وانا مذهولة... خايفة.. ما عرفت افكر او اتكلم..
ما كنت اشوف غير عيون غوية الواسعة.. مثل البحر.. والشمس يالسة بمحجرها..

قالت بصوت هادي.. مثل قصيدة حالمة...

وديمة....... ودامي.. انا بودركم..

وهنيه.. قلبي اتنفض من اعماقه..
حسيت برحيل الدنيا يخطف جدا روحي..

غويه..
غويه اللي ما تخيلت حياتي بلاها.. وين بتسير...

قالتلي.. وديمة.. وين سرحتي.. انا بعدني هنيه..

شفتها وعيوني ممزورة حزن....... ليش يا غويه.. وين بتسيرين..

ضحكت.. وشافت مكان بعيد بعيد.. غمضت عيونها الواسعة.. ولي غمضتهم كأن نور الدنيا صابه ذبول.. وانطفى...

قالت... خلاص يا غويه.. انا وافقت على حامد..

حامد.. حـــــامد ولد عمي..
ليش هو اصلا متى تقدم لج..

قالت. تذكرين يوم ردينا من العين.. عقب ما رفضت غدير ولد خالي ذياب..

هيه اذكر.. ومن يومها حامد تغير وماعاد ولد عمنا اللي نعرفه..

انزين... حامد قالي
( يا غويه.. انا امايه كل يوم تقولي بخطبلك غويه.. لكن قلت اول شي اخبرج.. واذا ياني الجواب من صوبج بعدين بخبرها تتقدم وتخطب..)


ومن هذاك اليوم ما كان وده يشوفني لي ما يعرف الجواب..


قلتلها.. هيه.. الحينه عرفت عوق حامد..
وليش ما كان يقرب صوبنا عقب سالفة العين..
انزين يا غويه وانتي ليش طولتي عليه.. يعني كنتي تفكرين.. ولا ما كنتي تبينه..

قامت غوية من مكانها.. ويت عندي.. وحطت راسها فحضني.. وشفت دموعها غزيرة لاول مرة في حياتي.. وآخر مرة بشوف دموع كثر دموع غوية هذاك اليوم..

والغريب.. اني ما عرفت اسباب الحزن ساعتها..

فقلت يمكن لانها فرحانه..
او لأنها.. (غويه) انسانة مب عادية.. انسانة تكتب (أعذب الوقت الرحيل) ما اعتقد انها عادية ابدا..

***


سرت صوب الهنديه اخبرها تسير بيت عمي وتتخبر عن حامد..
وتقوله وديمه تباك..


قبل الضحى..
كنت عند يدوه جفله..
قالتلي انها تبا تتصل بمانع وفلاح.. تبا تسمع حسهم لانها ما شافتهم من مدة طويلة..

وسرت اتصل بهم..
ورد علي مانع...

قتله...... مرحبا ملاين بمانع...

بالمهلي.. بالمهلي... معقووولة ودامي متصله تنشد عن مانع...

قتله لا لا يدوه جفله تبا ترمسكم.. دوك السماعة..

افااااا يا ودامي يعني ما كنتي تبين تنشدين عني..
قتله.. امممم.... بفكر...

قال... انزين يا وديمة.. الصوغة اليايه لي طلبتيها ما بتوصلج خلاف عشرين حول..

قتله لالالالا دخيلك...
الا الصوغة ما صدقنا نكشخ شويه... انا متصله بس عسب انشد عند..
هاه خبرني علومك.. وشحالهم الشيوخ اللي وياك..

وفلاح وينه.. ماله حس هالايام..

قال ما ادريبه عندهم امتحانات والظاهر سار صوب ربعه هل بوظبي اللي ساكنين صوبنا..

قتله منوه بعد هل بوظبي..

قال وانتي اشدخلج بهم.. يلا يلا وين يدووه....

وقبضته السماعه يدوه جفله.. ويلست اسمعها وهي ترمسه..
وكنت زعلانه عقب ما حصلت هزبه مرتبه من مانع..

المهم دقايق وسمعت صوت الهندية تزقرني.. عاد عرفت انه حامد وصل وسرت عنده..

دخل الحوي قال وين يدوه جفله.. بسير اسلم عليها..

وسار سلم على يدوه جفله.. وكانت ترمس بالتيلفون.. فيوم ظهر.. قتله حامد اسمع ترى غويه تقول..

حي بأصحاب الوفا الواصلين
بالنشود وبالتحية والسماع
سألكم لو هو مخفى يستبين
وان تناثر فوق قلوب خشاع
هو (الحب) اللي يخاوي المحبين
وإن خفى تظهره اعيون وساع

ضحك.... وردت الحياة بخفوقه.. شفت حامد مرة ثانيه..
حامد ولد عمي.. حامد الللي ما اذكر اني تأملته من قبل.. كنت دايما احس اني ما اقدر افهم هالانسان.. بس اليوم شفته غير.. شفت حامد اللي ينبض باحاسيس تشبه احاسيس غويه.. وارمس عمري واقول... (ويييه يا وديمة كل هالسنين وما خطر ببالج يوم انه حامد يشبه غويه)..

كان صدق يشبهها.. حتى بملامحه..
شعره الاسود.. وعيونه السودا.. عيون ابوي وعيون عمي وعيون غويه.. كلها تتشابه...


_


وانا غرقانه بذكرياتي..

ما وعيت الا وسمعته يقول...:

ردكم واصل والواصل مزين
مثل غيم فوق قامات الشراع
زفة (الحب) الذي أمسى حزين
بين جدران التوجع والضياع
تكشفه عين ولو هو ما يبين
وان توسد بيت قلبه وما يذاع
يا غويه.. يا ملاذ الحالمين
يا نجم..يا شمس يا أصل الشعاع
منهو اللي يحبس اللحن الحزين
وينثر أفراحه إلى كل البقاع
والمطر يسقي دموعه قبل حين
وإن رحل يبقى صداه بكل قاع
غير (حب) القلب ما شي يبين
والقصيدة بلاك.. ينقصها سماع


....قتله....... ودموعي تهطل
يا حامد..
أول مرة اشوف وصف يوفي غويه حقها..يوصفها مثل ما هي..
طول عمري ابا اعرف كلمة توصف غوية.. ومالقيتها الا يوم قلت..

منهو اللي يحبس اللحن الحزين
وينثر أفراحه إلى كل البقاع

هذي غويه.. هالوصف هو غويه..

غويه اللي تحبس ألحانها الحزينة..
وتنثر أفراح الدنيا في قلوبنا..

غويه يا حامد .. عرفت مقصدك يا حامد..

وصدقت..يوم قلت..
والقصيدة بلاك.. ينقصها سماع

غوية هي قصيدة..
وكل حرف من حروفها اغنيه..

آه يا حامد...

اختصرت عمرها في قصيدك....


...وهنيه دخل ابويه..
وسار حامد يسلم عليه..


وتمت ألحان قصيدته تلعب بقلبي مثل غيث الشتا.. لي يوقف..
يتم صوته يلعب بداخلي لأيام طويلة...

...بس ما تحركت من مكاني لوقت طويل..

ماادري كم من الوقت مضى..

ماادري العصر.. والا المغرب..
بس اللي عرفته..

انه حياتنا بتتغير من اليوم..
وغويه..

غويه بنت المر... بتسير..... جدا بيت العم
..................................
..................



***

[سر الحياة]

....." كان الجو بارد.. والدنيا شمال...
يلست تحت ظلال الغاف وحيدة..
أغني ويا لطيور.. وأكلمها.. وتكلمني..
وننسى شي اسمه هم.. أو أحزان..


بس أتذكر الأيام الطوايل.. والليالي الغافية.... والبحر..
وصوت المطر لي يعود في الليل ويغني ويطربني.......
بس يلست وحيدة....


وحتى قبل لا تسير غوية.. بحر من الغربة بدا يسكن سواحل قلبي.

ما ادري.. الحياة.. اتغيرت..
ولا قلبي اللي تغير..

كنت اسرح لوقت طويل طويل... ولا حتى كلام الغوالي يطربني..

غوية.. حست بخوفي.. ويلست قربي والدنيا هبوب..

ولعبت بشعري كأني طفلة صغيرة تشهد بعيونها الذاهلة اول شتا..

ما ادري..
بس احساس غريب غريب سكني.. والغريب اني ما كنت اقدر اذرف دموعي..

بس اسمع همسات الخلايق.. ويرد الليل يحزني..

ما أنسى هذا الوقت من حياة وديمة..
وديمة اللي فجأة حست بالغربة..
وخفق الخوف بداخلها لأول مرة...

والغريب في هذي الليله بالذات انه غويه يت صوبي وقالتلي يا وديمة..
مب بس انا فرحانه..
حتى انتي جدامج فرح كبير كبير بيوصل.. ويوم بيوصل تذكريني يا وديمة..

ما فهمت شو تقصد غويه..
بس كلامها تم محبوس بداخلي سنين طويلة..

شو هالفرح اللي تطريه غويه ؟!؟!؟


سألتها عنه...
لكنها ما ردت.. ومر الوقت.. وروحي معلقة بكل كلمة قالتها غويه.. (فرح بيوصل)



***



بعد أيام.. وصل خبر خطبة حامد وغويه حق الخلق من شمالهم لي جنوبهم..

من دواخل العين ومساكنها..
لي جدا لعوير ومزارعها......

والكل اتصل يهني ابويه.. الا خالي ذياب..
الظاهر انه ما نسى كيف رفضت غويه ولده غدير.....

بس امايه اتصلت بهم.. وخبرت خالي ذياب الخبر بروحها...
لكنه ما بارك لا حق امايه ولا حق غويه....

وحتى يدوه جفله زعلت منه يوم عرفت باللي سواه..

قالت حق امايه....
( انا شفت اخوان يتزاعلون... بس اللي سواه ذياب ويا ولده غدير شي ما ينطرى.. محد سوى شراته)


المهم...
ما عرفت كيف استوت الخطبة.. بس اللي عرفته انه عمي ظاهر وحامد ساروا عند ابويه وطلبوا غويه... بس شو الرمسة اللي استوت ما ادري عنها..


واول شي سواه ابويه سار وياب التيلفون من الصاله.. وسار صوب عمي واتصل بمانع وفلاح وخبرهم السالفة..


وبعدين مانع وفلاح رمسوا ويا عمي وحامد..

وأخيييييرا خطبوا غويه...

غويه
غويـــــــــه بنت المر

أحلى بنات عوايلنا كلهم..
البنت اللي ما تم حد الا ومدح مزاياها... انخطبت..

وأذكر انه وايد من ربعي زعلوا لانهم كانوا يبونها حق اخوانهم او عمامهم..

لكن نصيب..


وعوشة بنت خالي ذياب اتصلت تبارك.... بس مب من خاطرها..
لأنها أكثر وحدة بغت غويه حق اخوها غدير....

هالانسانة ما ادري كيف.. قالت حق غويه:
( بس لا تعرسون الحين.. عسب ما تغطون على عرسي..)

صدق لو كنت قريبه عنها كنت بذبحها.. ولا بعضها.... صدق انها تقهر..

وقلت حق امااايه وانا معصبة..
منوووه يقول اني سايرة عرسها..
لو تمشي بريولها بين العين ودبي سبعين مرة مب سايرة....

ويدوه جفلة تضحك.. وهي تيبب.. وتغني اغاني مال اول..
ويوم دخلت غويه علينا الحجرة...

قصدت يدوه جفله هذاك القصيد في غويه لي اليوم ما انساه...

هلا يا طلعة البدر المنير
يلي تم الكمال بلا قصور
ومن نثني عليها كل خير
وتشكرها البوادي والحضور
فريدة مالها معنا نظير
شبيه ولا لها في البيض جور
حشيمه وطبع معنها غزير
حليمه ما يتيه ابها غرور
يفول جنها ريم حذير
عليها من وصوف الحور حور


........
قلتلها صح لسانج يدوووه.. صدق انه عليها من وصوف الحور حور

.............


وكملت القصيده وهي تضحك.. وغويه يالسه صوبها مستحيه..


تقود أمن الظبا سرب يسير
بأمرها يوقفون وكل شور
عساهم دوم بالحال السرير
عليهم مـ الوقا والحفظ سور

.........
قمت وقلت
يدوه الليلة رزيف..

انا الحين بتصل بميثا.. وسهيلة.. وبخبرهم..



يدووه قالت لالالا يا ودامي الرزيف واليوله هذا في العرس.. الحينه ما يستوي.. شو بيقولون الناس..

قلتلها ما عليييييه يا يدوه الا نحن البنات محد عنده خبر..

عاد امااايه قالت هيه.. وين محد عنده خبر اذا ام حميد يارتكم..

الحين الخبر وصل لبلاد من اقصاها لي اقصاها..


(وضحكنا)
.........

وغوية.. ما اذكر اني سمعت رمستها الحلوة.. من سالفة خطبتها..

...وحميد ما مر صوبنا من ذاك اليوم..



***


الصبح.. ما وعيت الا وصوت ام حميد حاشر البيت..
(اول مرة اشوفها من عقب ما رمسوا عن خطبتي حق حميد.. وانا رفضت)

بس ام حميد انسانة غاويه بطبايعها..
ولا يابت سيرة اللي استوى على لسانها من هذاك اليوم..
وحتى ميثا.. ردت تزورني .. ونست اللي استوى..
وما تيب طاري اخوها حميد...
المهم..كانت ام حميد تحن تشوف العروس على قولتها...بس امايه ما تطيع



وفي الليالي التالية..

كل يوم يتصل مانع وينشد عن غويه..
ويرمسها بالطوايل.. وامايه تقول..
الله يهداك يا مانع توها خطبوها وانته تتصل كل يوم.. اخاف باجر لي ملجنا.. بتودر الدراسة وبتي تجابل غويه..

قاال هيييه با امايه هذي هب اي غويه..
غوية بنت المر.. غييير..

لكن اللي لاحظته انه فلاح ما رمس وياها... بس باركلها ورد السماعه لمانع..

قلت فخاطري اكيد عنده امتحانات وما يقدر يطول في الرمسه..

مانع خبر امايه انه يبا يرد عسب يحضر عرس بنت خالي عوشة...

عاد انا يوم سمعت السالفة سحبت السماعة عن امايه وقتله.. لالالا برايك مرخوص يا خوي.. مب لازم تراك واصل.. هنيه ولا هناك..

...(ضحك) مانع...
قال منووه....
يدوه وديمه.. يا مرحبابج..
وكيف يا يدوه كله واحد ......هنيه ولا هناك... شو هالرمسه بعد..

قتله.. بس ما في داعي اتعب عمرك..
وتسير وترد الا عرس..
( وانا فخاطري مغيضة من عوشوه.. وابا اسوي اي شي ينغص علييها)....

لكن.. ما سمع رمستي وقال انه بيوصل قبل عرس عوشة بيومين وما يدري اذا فلاح بيخاويه ولا بيرد بروحه..



***


ابويه خبر امايه انهم بيملجون عقب عرس عوشه لانه مانع بيكون موجود.. والعرس خلاف..

وانا مستانسه .. بس يوم تذكرت انه غويه بتسير بيت عمي ظاهر زعلت...

كيف عقبها يوصل الليل.. وغويه مب يالسة قريبه عني تكتب وتقصد..
كيــــــف بيوصل الصبح وما اسير صوبها اخبرها لعلوم والاخبار..

وعيونها السودا.. اللي تسحب البحر والشمس صوبها

كيف بتطلع الأيام... وما تشرق بقلبي من عيونها..

بس وناستي انها بتعرس وبتاخذ حامد كانت أكبر..


***


ابويه خبرنا عقب يومين انه عمي ظاهر ياي ويا حرمته يسلمون على غويه..

قتله يا ابويه الله يهداك.. الحينه مب اول مرة يزورنا عمي وحرمته..

....ويدوه جفلة تقول يا اميه يا وديمة... صح انها هب اول مرة يزورونكم
بس اول مرة يزورون خطيبة ولدهم..

قلت.. هيييييييه.. الحينه وصل الموضوع...
هنيه سرت بسرعة اخبر غويه...
قلتلها غويه غويه تعرفين منووه بيينا عقب يومين..

منوه يا وديمة..

قلت وانا ازااااعج واضحك....بيوون اهل الخطيييييييييييب..

غوية ضحكت هالمرة... أخييرا شفتها فرحانه..

وحسيت انه الدنيا بتتغير.. والحياة بتحلو.. أكثر وأكثر...



***



مرت ايام هالشهر بطيئة.. كأنه ما ودها توصل..

ما أدري
جاسني احساس غريب غريـــــــب..
انه الشهر ما وده يوصل وتوصل اشيا صعبة وياه.. خفت...


انا وغويه كنا نسير كل يوم نتزهب حق عرس عوشه..
(مع اني خبرتهم اني مب سايرة الا اذا مانع وفلاح لزموا اني اسير بسير... لانه الصراحه هالعوشه انسانة ما تحشم..)


ويدوه جفلة بعدها تتصل بخالي ذياب وولده غدير... وتحشرهم.. وتلومهم..
لانهم ما باركوا حق امايه ولا حق ابويه.. عسب خطبت غويه...


وكان ودي اشوف حامد عسب اقوله ( هلا الخطيب.. والله انه محد وارث الحظ في العايلة كثرك...)

وصدق
اللي بيحصل وحده مثل غويه.. اي حظ واصلنه..



الضحى اتصلت عوشه..
وانا ما كنت متفيجه حق هذربتها.. ومن غيضي.. سولفت عن غويه..

هي تقول.. ها وديمة.. شو جهوزكم حق العرس..
قلتلها ..
أمس سرت انا وغويه السوق.. تدرين.. يالسه تتزهب حق عرسها..

قالت.. شوه.. وانا...
(وقبل لا تكمل رمستها)
..وبنسير بعد سوق الذهب ويا مرت عمي عسب تشوفلها صوغة....
..... ويلست ارمس وارمس عن غويه...
ويوم ملت من رمستي..
وياها صداع من اللي قلته.. قالت وين يدوه اباها..

صدق شطانه هذاك اليوم ( كل ما أذكره ارد اضحك..)



***

[سر الحياة]

ومرت ليالي هالشهر.. مثل حالات القمر..

مرة اشوف البدر يضوي.. ومرة يخفيه السهر..

بس مرت الايام.. وصل اليوم اللي اتصل فيه فلاح.. كان وده يرمس امايه..

استغربت في البدايه..
بس يوم يت امايه ترمسه قال..
سامحيني يا خالوه ما اقدر ارد الحينه.. لانه امتحاناتي بتبدا عقب اسبوع.. كيف ارد عندكم.. ومتى برد عسب اذاكر.. استسمحي من هل العين كلهم واحد واحد..

امايه قالتله مرخوص يا فلاح.. ومسموح ماشي فخاطرهم انشاالله...
بس نشدته عن مانع..
خبرها انه مانع بيظهر مسا اليوم.. وبيوصل الفجر عنا.... هنيه امايه صاحت من الفرح..

مر وقت طويل وهي مب شايفه لا مانع ولا فلاح..

والحينه حتى فلاح ما بتشوفه..
و يوم خبرتني انه فلاح مب ياي زعلت وايد..
سرت خبرت غويه.. غويه تغيرت..
وجاسها خوف.. وما قدرت تقول شي..

وانا تميت زعلانه حتى عقب ما وصل مانع الفجر..

كنا كلنا يالسين في الحوي نترياه..

حتى يدوه جفلة حليلها كانت واعية.. ومزهبة البثيث والخبيص .. وحاطه القهوة عالضو..

ووصل مانع.

أخوي مااانع اللي اشتقت حق حشرته وسوالفه..

اشتقت ازقر اسمه في البيت..

واشوفه واصل.. وظاهر...

واسمع رمسته الحلوة..

غوية يوم سلمت عليه ما هدته.. ويلست تصيح كأنها تشكيله.. ..
من خاطرها كانت تصيح..

عاد هو مسح دمعها... وقالها ضحكي يا غويه ضحكي..
خليني اشوف احلى عروس في لبلاد..

قتله...
وانا يا استاذ مانع..

قال... اووووه يدوه وديمة.. وسلم علي وهو يضحك..

وامايه ما كانت مصدقة انه فلاح مب ياي ..
كانت تتحراه بي.. وبيغير رايه.. لكنه كان محد..

مكانه خالي.. صدق خالي.. ولا شي يعوض غيابه.
حتى ابويه كان مفتقد فلاح. وما يرمس ويا مانع الا عنه..

و حامد كان برع البيت.. ما دخل.. عاد يوم تلثمنا وغويه دخلت..
دخل حامد سلم علينا وسار ويا مانع الصالة يتقهوى وياه لانه يدوه جفلة لزمت عليه يدخل..

وهو المسكين يخيل.. لازم معرسنا...

وابويه من التعب سار رقد..

وانا سرت حجرتي اتريا مانع يمر صوبنا .. ويخبرنا علومهم...

وشوي الا يوصل الغيث البارد..

عاد ظهرت في الحوي وازاقر عليهم مطر.. مـــــــطر

ظهروا كلهم برع حتى ابوي ظهر يدعي ويسبح..

ويدوه جفله دموعها انتثرت مثل المطر..

وتقولي يا وديــــــمة ذكرتيني يوم نحن يراوه..
كنت انا اول وحده تظهر الحوي.. لي سمعت حس المطر يوصل... وأقول..

دق يا مطر دق
بيتنا يديد
دق يا مطر دق
بيتنا يديد
دق يا مطر دق
مزرابنا حديد
والليلة ليلة عيد
دق يا مطر دق
دق يا مطر دق...
..........
............

صوت يدوه جفله الصافي
اللي يذكرني بالبحر.. والمطر
صوتها بروحه قصة دافيه..
عايشه بقلبي طول العمر

آه يا ذكرى تلعب بقلبي.
هذا العمر..اذكره ساعة بساعه.. كأنه ما غاب...
كأنه حلم.. سريع مر مثل الشتا اللي خطف على قلوبنا وما درينابه..
ومثل المطر صاب الحياة.. وارتحل فجأة بعيد.. بعيــــــد

الله يا زمن..



***


ومن الصبح كانت يدوه جفله يالسه تعين الحنه.. عسب نتحنى المغرب..

ولأنه عرس عوشة عقب ليلتين..
يدوه جفلة قالت لازم اسير العين.. مع انها كانت مب صاحيه.. وحاسه بويع.. بس لانه باجر بيوصلون الناس عسب يسلمون عليهم.. وامايه بعد قالت انها بتسير..

لكن انا وغويه ما طعنا نسير قبل العرس بليلتين..
خاصة انه غويه ما تبا تشوف خالي ذياب ولا ولده غدير.. فما تبى تسير تيلس عنده..
وانا كثر ما كنت مغيضه من عوشه.. يلست ويا غويه.. وخبرنا ابويه انه يودينا خلاف..


قبل العصر.. امايه ويدوه جفله وحرمة عمي ظاهر.. ساروا العين ويا مانع..


...
ويتنا سهيلة واختها فطيم.. عسب يحنونا في البيت..
فطيم حناها وايد غاوي..
وهي روحها غاوية..


قلت حق غويه
تذكرين يوم امايه تقول بتخطب فطيم اخت سهيلة حق مانع...

قالت هيه اذكر..

قتلها شوفي.. عيل بنخليهم يلسون عنا لي عقب العشا ما بنودرهم..
وانتي اتصلي في امهم وخبريها..

غويه استغربت .. وقالت انزين برايه بس ليش..

قلت...
لانه ابا مانع يوصل ويشوف فطيم.. يوم هي ظاهرة..

(وضحكت) غويه من خاطرها..
قالت صدق يوم قال مانع عنج.. يدووه وديمة..
ولا بعد مستويه خطابه..
(ضحكت وانا ضحكت وياها)




***



عقب العشا..
كان مانع واصل.. سرتله الحوي ارمس وياه عن عرس عوشه.. وهل العين...

...وخبرت غويه انها تظهر ويا قوم سهيلة وفطيم اونها تودعهم..

ويوم وصلوا عند الباب..
اشرت على فطيم وقلت بصوت عااااالي فطييييم فطاامي شوفي حنايه اختربت..
عاد هي المسكينه يت صوبي.. اونها تشوف الحنا..

ومانع شرد..

...........


عقب ما ساروا سرتله .......
قتله شحاله المعرس..
قال ودموووه يوزي عني تري بتوصل لعلوم حق امايه..

قتله..... اوووه خبرك عتيييييج..

قال ليش.. شو السالفه


شفته وانا مستانسه..
امايه اصلا هي اللي موصيه عليها.. وتبا تخطبها اليوم قبل باجر..
هاااااه الحين شو الراي..

قال بشو
قتله شو شفت فطييم.. تصدق سبحان الله تقول مفصله حقك..

ضحك.. وقال انزين يا يدووه وديمة.. شورج بعد هدايه الله...

عاد من الفرحة قمت اونه بيبب بس غويه ما خلتني..
قالت ان سمعتج ام حميد بتربع صوب بيتنا.. والله يعينا على رمستها..

المهم
انه مانع عيبته فطيييييييم

وكان هالموسم.. موسم خطاطيب ومعاريس.........

صح اني كنت زعلاااانه لانه فلاح مب ويانا..
بس بعد استناست انه مب هنيه.. قلت عن يخطبوله بعد.. وهذا اللي ما اتصورته فحياتي..



***


وظهرنا من الصبح قاصدين العين
ويا ابويه ومانع

وعمي ظاهر وحامد بعد سبقونا..


ووصلنا صوب بيت قوم عوشه..

والليله كان العرس غاوي.. مثل اعراس هل العين..

عاد انا اسميه نعشت ..

وغويه شلت بصوتها الغاوي ويا يدوه جفلة.. ويابت هذاك القصيد الزين..

وانا نسيت اني لازم اكون مغيضه من عوشوه.. واستانست واايد..

وغويه كانت احلاهم احلاهم..
ويا الاثمد اللي يرسم عينها الفتانه
وثوبها الأحمر...

كنت اتخيل انه عرس غويه وهب عرس عوشه..



***