كيف تكون زوج مرغوب به ؟!؟!؟!؟

[¤§ ريم الغـلا §¤]

السلام عليكم ورحمة الله وبركاته ،،،،



الكل من قبل تكلم عن الزوجه وعن كيفية المحافظه على زوجها ..

لكن هالمره راح أوجه هالموضوع للرجل ( الزوج ) وكيف يحافظ على زوجته .. ويكون زوج سنع ....

الزواج مبني على الاثنين .... وبذل الجهد لابد يكون من الجهتين ... يعني حتى الرجال لازم يتمسك في مرته ... ويحافظ عليها ...

لان ما اعتقد في شخص على وجه الأرض يرفض النعمه لما تجي له بمعنى " ان اذا الشخص كان معاي زين ولا ضرني ولا قصر معاي بالعكس أعطيه عيوني " ...

طبعا في ناس ما يبين في عينهم شي .... بس الواحد يسوي اللي عليه ...

التعامل والاسلوب :
- يعني لما تسألك مرتك وتطلب منك شي ..... تعرف شلون ترد عدل !! ...... يعني خلك دايما مهتم " هلا حبيبتي .. آمري!" ... واذا كنت مشغول " كاني عمري جاي لك بس اخلص اللي عندي "

(يعني تعلم تكون ذرب في التعامل ... لا تصير دفش ومالك داعي )

- خل أسلوبك راقي بالتعامل ... بين مرتك وأعيالك ... يعني الفاظ بذيئة كيفك تقولها بالدوانيه وانت تتحلطم بالسيارة ... لكن في بيتك لا تقولها ...

- أسلوب اللي كلا إنت ذكي واتعرف ومرتك غبية وما تفهم ... لا تنزل من قدرها .. بين لها وعلمها وفهمها بدال الطنازه والتعيب .!!

- خل السانك حلوو .... وكلا حكيك ينقط عسل .... بس مو على مصاخه ... يعني ابسط شي لما تناديك ..رد عليها " هلا حبيبتي !"

- لما تكون قاعد مع ناس .... لا تخالف مرتك الراي .. خلك في صفها دايما .. لانك لو حطيت روحك مكانها راح تتضايق انها تطلعك غلطان والا كلامك مو سليم جدام احد ..

- لما تعصب .. حاول تتحكم بروحك .. والتفاهم زين .. وعط حق مرتك مجال تتكلم " لا تتعود على الصراخ " ..

- خلك مع مرتك كل شي ... وسولف معاها ... شنو صار معاك كل يوم ... تقدر تقولها همومك ... وتاخذ رايها بشي ...وحتى اذا كانت زعلانه لازم اتعرف اتواسيها مو تزيد الطين بله ..

- حلو انك تلاحظ أي تغيير صار بالبيت بالغرفه في مرتك .. وتبدي رايك بالاعجاب .. حتى لو مجامله بس لا تفشلها(حتى الاسلام سمح في ذلك ...)

- لا تصير كنك طفل .. وأناني . وكلا انت التعبان والمريض المسكين .. ولحد يستخدم اغراضي ..!!

الاهتمام بالمظهر والنظافة :- يعني انت رجال تروح الدوام تطلع تشتغل .. سواء بالصيف بالشتاء .. الجسم يحتاج سباحه وعطر .... واللي ما يدري في اختراع اسمه "ديودرن" مزيل رائحة العرق ..

- ضروسك .. أسنانك .. .. بلــــــــــــيز فوق الزقاير والصفار والحالة الكسيفه .... هم ريحه نفاثه !!! رجاء الفرشه والمعجون صباحا ومساء

- يعني يشوف شكله واللي مرته تحب يعني مثل ( لحية - قفل - بدون شوارب - ديرتي ) ... ويهتم في قصة شعره ونظافته .

- وسوالف ساعة ذهبيه ( اصلا حرام الرجال يلبس ذهب) ... وشغل خواتم وسلاسل ...سوالف الراب وخواتم المشعوذين ... (ما فيها حلا كلش ) .. وتروالي الاكسسوارات حق البنات .. يعني حدك الدبله بس ..

- يعني وانت قاعد بالبيت لا تصير شايب شغل مكسر لا وبدون اندر وير ( الله يفشلك) ....البس .. يعني شورتات .. بجامات سنعه .. تريننجســــوت ...

الصفات :
- الحنان ... خلك حنون كثر ما تقعد .... طول ما انت يمعها دفها بحنانك ..يعني وانتوا مثلا بالصاله قاعدين تطالعون التلفزيون ... قولها "حبيبتي تعالي قعدي يمي وحط ايدك على كتفها .."

- الحب ... اول ما اتيي لمها حيل .... قولها احبك ... ولهت عليك... حتى لو تتصل عليها في وقت اهيه ما تتوقعة وتقولها " ولهت عليك"

- المرح والوناسه .... كلا جد بجد ما لاينفع وفيها ملل .... تغشمر معاها انخش عنها ... تعافر .. خرعها ... المهم تمرون بلحظات ما تنسونها ... حتى لو تلعبون ظلمه....

- الكرم .... اعوذ بالله من البخيل .... اذا ما صرفت الفلوس على بيتك واعيالك وين توديهم !!! ...

- الصراط المستقيم .... خلك ماشي سيده دام تبي مرتك تكون بالمثل .... تصونك صونها .. تحبك حبها ..( يعني لا تخربط وتكام بنات وتخونها ) ..... ترى اكره شي اللي عيونه زايغة .

- الشجاعه .... خلك رجال قول وفعل .. يعني لا تصير خيخه وما عندك كلمة ... مرتك تبيك وقت الشدايد ورجال يسندها ويستر عليها .. لا تصير سكانه أمه .... والا كلمه اتجيبك وتوديك ....

- السنع ... يعني سواء مع مرتك أو عيالك ... مع اهلك .. اهلها .. خلك ذرب سنع .. اتعرف تتصرف تكلم ...مو كلا روحي انتي بروحك.. روح معاها .. موكلا مالك خلق شي .!!

- الصراحه ... شغل لف ودوران والكذب اللي ما له داعي .. عـــــــــــــــيب .. عيب .. مرتك بتكون عارفتلك يعني بتكذب على منو .. وبعدين الكذب حبله قصير ما ردها بتطيح عليك.

- العدل .... لا تمشي الامور على كيفك .. حط نفسك بنفس الموقف .. واعترف بالغلط .. وتأسف بعد .. كل شي له حد ..

الحياة الاسريه :
- لازم تطلع مع مرتك او انت وعيالك كلكم مع بعض .... تتغدون والا تتعشون بره .. او تودي اعيالك ألعاب .. تتسوق مع مرتك .. وتعطيها رايك ..

- لازم تشتري أغراض البيت .. .. هذا واجب عليك ..وتسأل دايما شنو يحتاجون ..

- حلو إنك تدخل بهديه او شي حلوو حق مرتك ... وحلو انك تفاجئها بأشياء لا يمكن تتوقعها ... أو بالدوام مثلا ارسل لها ورد في مناسبة معينه " اصلا راح تطير من الفرح " ..

- حلو تلعب مع اعيالك ... تقضي وقت بالبيت .. لازم اتحس ان عندك اسره وانك زوج وأبو ..

- خل عندك طولت بال حق مشاكل العيال ... والبيت ... وحاول تحلها بدال التذمر ..

الحياة الرومانسية :

- هذا أهم جزء بالموضوع كله ... خلك رومانسي ... والرومانسيه فــــــــن ... لكن مو صعب ... الرومانسيه بالكلمه ... بالحركه ... اختيار الوقت المناسب .. الأستعداد النفسي ... حتى المكان ...

- ترى الحياة الزوجية وبالتحديد... وقت ممارسة الحب ... دائما اللوم على المرأه وانها بارده ولا تعرف تتصرف وتوفر الرضا الكامل للزوج !!.... المرأه بطبعها حياوية .. والرجل والمعروف دايما هو المتحكم وسيد الموقف ... لابد ان يزيل الخجل ويعرف كيف يتصرف ...

- المصارحة حلوه في هذه الأمور ... حتى يسعد الاثنان معا ويتحقق الرضا الكامل .... وهذا ليس عيب ..

العيب الحقيقي : لما يستمر هذا الوضع البارد والتذمر ... ويلجا بعدها الزوج او الزوجة للعلاقات المحرمة والخرابيط .
- - حلو انك تاخذ اجازه إنت ومرتك ... تسافرون مكان هادئ تغيرون جو .. مو كلا قاص عليها ومسافر مع ربعك ..( وماشاء الله كلا بتجيب بضاعة والا تشتري سياره!! )

- ترى ما فيها شي اذا سويت فكره او مفاجاة ... وحطيت شموع وسويت ديكوريشن حلوو وقلت حق مرتك يلا شوفي ... عادي ترى هالسوالف مو بس حق الحريم ..

عش الزوجية :
- لازم يكون عندكم مكان ... صح يتسمى شقة او مكان ينسكن فيه .. غرف كفايه ومطبخ وتكرمون حمامات .....

- بعدين اهتم اشوي في بيتك ..الاثاث .. الصحيه .. الكهرباء .. مو كلا انزين انزين وماكو شي ...!

- إدفع الايجار أول بأول ... مو ياهل انت بعد حسبالك مطوف مكالماتك ..!!

الاخلاص :

- بدونه الزواج يخترب ... اذا ما اخلصت حق بيتك ومرتك واعيالك ... بعد خلاص شنو فايدتك !!

- اذا تبي مرتك تخلص لك يا أخي اخلص لها ... عاملها بالمثل ...!!

- صلح الغلط بدال لا تعفس الدنيا !! مو حسبالك راحتك بره مع فلانه وعلانه !!

- وانت تمشي بالسوق مع مرتك اذا وحده فصعه تطالعك صد عنها .... مو طايحله مكاسر وجنه العيد ..


- لما ما تقصر على مرتك وتقولها الحجي الحلوو .. وتروح اتكلم من وراها .. وتقول " انا ما قصرت معاها كل شي مسويلها " ... شنو هالحكي شنو هالتناقض ..!! ...يعني صح عايش حياة مزيفة .... انزين ماكو شعور !! والا يعني هذي يسمونها كماليات قدام الناس ومرتك !!

كل زوج ينظر حق تصرفاته وشنو اللي سوا وشنو للحين ما سوا ... لا يقول ما أدري والا ما كانت عندي تجارب كل الناس جذي ... في شي اسمه سؤال في يسمع في يقرا ...

ويحاول يعدل الوضع ... لان خلاص تزوج وخصوصا لما يكون في اعيال ....

يعني حاول انك تعطي مو بس تاخذ ...

واتمنى التوفيق للجميع.....

منقوووول .....


تحياتي .....


أختكم .......

[علي مكحول]

-

*

/
ريم الغلا
موصوع حلو
بس انا ماني متزوج زلا يحزنون ... والاسنان ابشرك مره كويسه
والعرق وريحته .. كل يوم مزيل عرق انترشرش به كل ما
تروشنا والصرفيه ابشرك اذا ما صرفنا على بيتنا
صرفنا الاصدقاء الاعزاء ... فقط
والا ما فيه صرف اصلا
على شان الواحد
مطفر
-

*

/



دمتي بحب ريم
على مكحول

[¤§ ريم الغـلا §¤]

اشكر مرورك اخوي


بس هذي نصايح للمستقبل


يعني وقت ما تتزوج ،، زوجتك راح تدعي لي ، طبعا اذا التزمت بالنصايح

[علي مكحول]

-

*

/
ريم الغلا
معليش التزام ... اصلن من اللي
قال اني بتزوج
-

*

/


دمتي بحب ريم
على مكحول

[همسة غلا]

غاليتي .. ريم الغلا

تسلمين ياقلبي على هالمشاركة القيمة

واذا التزمو الازواج بهالنصايح بتصير حياتهم من احلى مايمكن

وترى الزوجات يرضيهن أقل القليل

دمتي بخير

[¤§ ريم الغـلا §¤]

مشكووووووره همسه على مرورك ،، اللي بصراحه اضاف لمشاركتي

ويا هلا فيك

[البــــــــدر]

:o:oهمسة غلا ((( وترى الزوجات يرضيهن أقل القليل )) لاوالله بعضهن مايملها عينها اللى التراب



ريم الغلا / الله يجزاك خير على النصايح والله أنك وفيتي وكفيتي أنتي من بنات جنسهم وتعرفين اللى يبونه


بس أذا أني طبقت النصايح ولانفع معها وش أسويبها:mad:

[°oOسالفــة عشــاقOo°]

السلام عليكم ريوومه عزيزتي وتسلمين واكيد لومشوا عليها بتكون حياتهم عسسسسسسل*عسسسسسسل مو بس اول الشهر
وتسلمين